Caza y toros, sí; cooficialidá, non

Mercedes Fernández reafirmó nel Comité Executivu del PP les prioridaes del so partíu.

Apoyu a la caza y los toros y oposición frontal a la cooficialidá y al impuestu de socesiones. La presidenta del Partido Popular (PP) tien nidio la posición de la so formación al respeuto d'estes cuestiones y amuesa'l so arguyu por ser los únicos que s'oponen tanto a la igualdá de derechos de los falantes d'asturianu colos de castellanos como a dichu tributu.

Según afirmó, el so partíu ye'l que “defende a los cazadores y refuga'l canon cinexéticu, y defende la fiesta nacional ensin nengún tipu de complexos, con respetu y con claridá”. D'igual forma declaró que "tenemos que dedicanos a combatir a la izquierda, porque yá toca que'l PP gobierne Asturies".

Tres criticar al PSOE y a Podemos pola so postura na defensa del carbón, calcó que “namái falta que nos quiten la sidra”, y unvió un chisgu a Foro al asegurar que "sólo PP y Foro defendieron l'interés xeneral d'Asturies".