Asturies asítiase ente les comunidaes con menos corríes de toros

|
Feria de Begoña 2017

Cola esceición de Canarias y Catalunya, onde tán prohibíes, Galicia, Illes Balears y Asturies, coles cuatro de la Feria de Begoña, son los territorios que celebraron nel 2017 menos corríes de toros. Nel llau contrariu ta Andalucía, que suma un total de 85 espectáculos.

Pontevedra y O Páramo (Lugo) concentraron les 3 corríes de toros que se celebraron nel 2017 en Galicia, mesma cifra que nes Illes Balears, col Coliseo Balear de Palma como sede. Esi mesmu añu’l Gobiernu insular aprobó la Llei 9/2017, de 3 d’agost, de Regulació de les Corregudes de Toros i de Protecció dels Animals a las Illes Balears pa prohibir la ‘lidia’ con muerte nel so territoriu, norma que’l Tribunal Constitución modificó esti mes anulando los artículos más importantes de la mesma, permitiendo asina la execución de los animales.

Asturies, con 4, ye’l siguiente territoriu con menos corríes, según los datos aportaos pol Ministeriu de Cultura que nun inclúin nuviellaes nin 'rejoneos' –en Xixón hebo una de cada nel 2017, pa sumar un total de 6 eventos taurinos–. Toos axúntense na Feria de Begoña de Xixón, que n'agostu acueye la plaza de toros d’El Bibio, mentes qu’en tol país nun se rexistra nengún festexu popular con toros, siendo l’únicu del Estáu xunto con Canarias y la ciudá autónoma de Ceuta –que tampoco cuenta con corríes– ensin fiestes d’esti calter.

El casu canariu y catalán

Canarias tien dende’l 1991 con una llei de proteición de los animales que prohibe tanto estes fiestes como les corríes de toros. En Catalunya, mentes, tán prohibíes les corríes dende’l 2012 y, a pesar d’haber una sentencia del 2016 del Constitucional qu’anula la llei catalana, éstes nun tornaron a celebrase hasta la fecha, anque la norma catalana caltuvo los festexos populares con toros, los correbous, con 58 entamaos en tol territoriu nel 2017.

Nel llau contrariu tán Andalucía, con 85 corríes; la Comunidad de Madrid, con 73; y Castilla-La Mancha, con 54 a pesar de vivir un descensu significativu de les mesmes. Pela so parte, ne dos primeres hebo un aumentu importante d’esti tipu d’espectáculos, siendo los únicos territorios onde medraron con respueto al 2016 xunto con Castilla y Lleón (53 en total), Aragón (20), Cantabria (7) y Illes Balears (3).

Na semeya, momentu d'una de les corríes de la Feria de Begoña del 2017.

Contador Estadistiques