Asturies celebra’l 8 de setiembre

Esti domingu, 8 de setiembre, ye’l Día de la Nación Asturiana. Uviéu va centrar les movilizaciones reivindicatives, mentes que Xixón acueye la folixa popular de Podemos, Morcín l’actu d’Izquierda Xunida (IX) y Cabrales les celebraciones entamaes pol Gobiernu.

#LluchandoPolaSoberanía convoca una manifestación baxo’l lema ‘Asturies tiempu de nós’ que va salir del Eurostars Hotel de la Reconquista a les 12.30 hores, con delles paraes en llugares destacaos de la ciudá pa denunciar delles situaciones y reivindicar lluches sociales. El final de la mesma va ser la plaza’l Paragües, onde va haber una xinta popular y xuegos tradicionales a lo llargo de la tarde, amás de dellos talleres: ‘Renta básica de les iguales: una ferramienta pa la tresformación social’ (16 hores), pola Asamblea Asturiana pola Renta Básica; ‘Protocolu feminista en construcción’ (17 hores), por Ruxerrux; ‘Taller antirrepresión’ (18 hores), por Casos 11 Reconquista, 5 del Naranco y PAH; y ‘Taller de baille y pandereta’ (19 hores), por Les Pites.

Partíos políticos como Andecha Astur, sindicatos como la Corriente Sindical d’Izquierda (CSI) y coleutivos como Mieres en Llucha, ente otros munchos, sofiten la convocatoria. Otra manera, el llunes #LluchandoPolaSoberanía entama un ruta de montaña baxo’l nome de ‘Asturies nun tien rei’ per Grau, en concreto per escenarios de combates del 1808 asina como peles trincheres y restos bélicos del Frente del Nalón na Guerra Civil, con salida a les 10.30 hores del apeaderu de Peñaflor, onde va celebrase una xinta al finar la caminada.

Podemos

La folixa popular de Podemos pol 8 de setiembre treslládase del Solarón al Muséu del Pueblu d’Asturies, onde venía celebrándose n’años anteriores. Música, xuegos, alderique políticu y confraternización son los ingredientes d’esta xornada que va comenzar al meudía cola apertura de la Feria del Llibru, Discu, Artesanía y Producción Ecolóxica, y col taller ‘Circo bajo el tejado’.

A les 12.30 hores va comenzar l’alderique políticu, nel que van participar l’eurodiputáu Miguel Urbán y la sindicalista y activista gallega Laura Bugalho. Tres la xinta popular va haber el monólogu ‘La chupa’l Sebas’ de Carlos Alba ‘Cellero’ y Maxi Fe de Ratas, una actuación de Los Gascones y xuegos tradicionales, ente otres actividaes, pa zarrar a les 18.30 hores col actu central y l’actuación de Los Pinflois y la pinchada de DJ Populista.

Izquierda Xunida

Tres celebrar l’añu pasáu la so fiesta nel Muséu del Pueblu d’Asturies, Izquierda Xunida (IX) tresllada’l so actu a Morcín. Ésti, enfocáu a la militancia, va desendolcase nel Colexu Públicu Horacio Fernández Inguanzo.

Actos oficiales del Gobiernu en Cabrales

Cabrales releva a Casu como sede de los actos oficiales del Gobiernu. Un mercáu tradicional, una feria de productos asturianos, folclor, deporte tradicional, actividaes infantiles y conciertos van entamase nel conceyu, mayormente n’Arenas, el sábadu y el domingu.

La música n’asturianu va tener un pesu importante na programación d’esti añu, coles actuaciones de Lafu y Rebeca el sábadu a les 20 hores y el de l’Asturiana Mining Company con Berto Varillas darréu, amás de la d’Héctor Braga a la mesma hora del domingu, a la que va siguir un conciertu de Marisa Valle Roso. Tamién va haber tonada, coros, baille tradicional y teatru mientres los dos díes.