Barbón emplegó l’asturianu nel so mensaxe pol Día d’Asturies

|
Cabecera manifestación 'Asturies tiempu de nós' nel Día de la Nación Asturiana 2019

El presidente Adrián Barbón emplegó l’asturianu en parte del so mensaxe a les asturianes y asturianos pol Día d’Asturies, xornada protagonizada pola folixa y el deporte. Tamién pa la reivindicación, con una manifestación soberanista n’Uviéu y actos de Podemos y Asturies pela Izquierda en Xixón y Morcín, de manera respeutiva.

Foron sólo 23 segundos d’un discursu de cerca de 4 minutos, pero un xestu simbólicu d’importancia. El socialista Barbón tornó a emplegar la llingua asturiana nuna intervención institucional, nesta ocasión el mensaxe pol Día d’Asturies emitíu per TPA y en redes sociales.

“Güei ye una xornada pa la ilusión, pa reconocer la nuesa identidá y sentinos parte d’una tierra que suma sieglos d’historia. Güei nun ye una mañana pa escaecer el pasáu, pero tampoco pa quedar prendíos de la señaldá, como un día cargáu de ñebles que nun son quien a allumbrar envueltu nun mal suañu que nun nos dexa despertar y incorporanos. Dicho cola guapura de la nuestra llingua, güei atrevámonos col futuru”, apuntó en llingua asturiana.

‘Asturies tiempu de nós’

#LluchandoPolaSoberanía convocó a asturianes y asturianos a participar nuna manifestación soberanista n’Uviéu’l Día de la Nación Asturiana baxo’l lema ‘Asturies tiempu de nós’. Numberoses persones participaron na marcha, con salida nel Eurostars Hotel de la Reconquista en protesta pol tratu a los trabayadores por parte de la empresa xestora del edificiu de titularidá pública y en defensa de los ’11 del Reconquista’ qu’esti mes van dir a xuiciu por interrumpir la rueda de prensa del Gobiernu sobre la presencia d’Asturies en Fitur, celebrada nes instalaciones de la instalación hotelera, a los que l’acusación particular pidi-yos pena de cárcel.

Nun foi l’únicu casu de represión que se denunció mientres la marcha, como la de les 5 del Naranco, con delles paraes nel camín hacia la plaza’l Paragües nel que se trató la situación de la mocedá asturiano, la presencia cada vegada mayor de cases d'apuestes nel país y la problemática de les especies invasores. Una xinta popular, xuegos tradicionales y talleres a lo llargo de la tarde sobre la renta básica, feminismu, campañes antirrepresives y baille y pandereta completaron la xornada.

Reforma del Estatutu

Podemos celebró nel Muséu del Pueblu d’Asturies la so folixa popular, que contó cola presencia de l’eurodiputáu Miguel Urbán y la sindicalista y activista gallega Laura Bugalho, y na que s’entamaron alderiques con dellos convidaos y espertos ayenos a la organización, como’l profesor David Manuel Rivas. El secretariu xeneral Daniel Ripa defendió qu’Asturies “nun pue vivir de pidir a Madrid, tien qu’empezar per sí mesma a solucionar les problemes”, y demandó ferramientes n’Asturies “pa poder impulsar cambios”, lo que pasa “pol aumentu de l’autonomía”.

Nesis sen, el dirixente llamó a “abrir una reforma del Estatutu d’Autonomía” aprovechando la mayoría parllamentaria que suma’l so grupu, la FSA y Izquierda Xunida pa que, ente otros asuntos, “permita avanzar hacia la oficialidá”. “Nun hai qu’esperar, tenemos qu’empezar yá”, añadió al tiempu que reclamó a Barbón “llexislar a favor del asturianu”.

Defensa d’otres feches pal Día d’Asturies

Faustino Zapico, secretariu xeneral d’Izquierda Asturiana (IAS) –formación que participó na coalición Asturies pela Izquierda–, intervino na celebración d’IX en Morcín, onde defendió otra fecha diferente al 8 de setiembre pa la celebración del Día d’Asturies. Bien conocida la so postura a favor del 25 de mayu, l’historiador apunto que “creemos que hai feches muncho más emblemátiques pa la celebración de la identidá asturiana, porque’l 8 de setiembre nun ye, propiamente, el Día d’Asturies, sinón el Día de la Santina. Realmente, la batalla de Cuadonga nun sabemos cuándo ocurrió, en qué fecha concreta”.

Tamién reflexonó sobre la situación real d’Asturies, que calificó de “mui grave”. Nel actu, celebráu nel Colexu Públicu Horacio Fernández Inguanzo, tomaron amás la pallabra’l coordinador xeneral en funciones d'IX, Alejandro Suárez; la vocera parllamentaria Ángela Vallina; y l’alcalde Maximino García.

Folixa en Cabrales

Arenas y Carreña acoyeron los actos oficiales pol Día d’Asturies, a los qu’acudieron numberosos representantes del Gobiernu, incluyíu’l presidente Adrián Barbón. Un mercáu tradicional, una feria de productos asturianos, folclor, deporte tradicional, actividaes infantiles y conciertos entamáronse en Cabrales, destacando les actuaciones de Lafu y Rebeca, l’Asturiana Mining Company con Berto Varillas, Héctor Braga y Marisa Valle Roso.

Na semeya, cabecera de la manifestación de #LluchandoPolaSoberanía n'Uviéu.

Contador Estadistiques