El miércoles va entrar en vigor el zarru d’Asturies

|
Adrián Barbón zarru d'Asturies II

El presidente Barbón da’l pasu de zarrar Asturies. El miércoles va entrar en vigor esta midida pa tratar de frenar l’espardimientu del coronavirus SARS-CoV-2, qu'agora pue establecer depués de que’l Gobiernu d’España decretara'l domingu l’estáu d’alarma.

Salvo causa xustificada, naide va poder salir nin entrar nel país a partir de la medianueche de mañana nes dos selmanes próximes, condicionada al actual estáu d'alarma que l'Executivu estatal nagua prorrogar. Adrián Barbón treslladó esta midida, que yá defendió na primer fola de la COVID-19 y nun pudo poner en marcha pola falta de competicies, al Comité de Crisis de COVID d’Asturies y darréu anunció la so decisión nuna comparecencia.

La declaración del estáu d’alarma por parte del Gobiernu d’España ayeri tres el pidimientu de diez executivos autonímicos, ente ellos Asturies, y la ciudá autónoma de Melilla, nesta ocasión colos presidentes autonómicos como autoridaes delegaes del mesmu, permite agora al llavianés zarrar les llendes del país. Esta midida nun va afeutar a los confinamientos perimetrales de Xixón, Uviéu y Avilés, que van siguir vixentes hasta’l 7 de payares.

Retrasu del toque de queda

Na so intervención, Barbón tamién comunicó que va retrasar una hora’l toque de queda. Asina, dende esta nueche va ser de les 00 a les 6 hores, pa dar tiempu a los ciudadanos a tornar a casa a partir del pieslle de la hostelería, afitáu a les 23 hores.

Contador Estadistiques