Arboleya sal escoyíu secretariu xeneral d’Andecha, que va dir a les Europees con Agora Repúbliques

|
Mariano Suárez, Carme Pérez y Josu Juaristi Conceyu Nacional d'Andecha Astur 2019

Paulo Arboyela, candidatu d’Andecha Astur nes Nacionales últimes, salió escoyíu como secretariu xeneral de la organización nel Conceyu Nacional del sábadu. La militancia aprobó la participación nes Europees del 26 de mayu na coalición Agora Repúbliques xunto con EH Bildu, Esquerra Republicana de Catalunya (ERC) y BNG.

El vascu Josu Juaristi, eurodiputáu de Los Pueblos Deciden, participó nel Conceyu Nacional que se celebró en Xixón baxo’l lema #YeAsturies. Nél resultó escoyida la Xunta Executiva nueva, con Arboleya como secretariu xeneral, que queda formada por Dulce Xil, Mario Arbesú, Llucía Fernández, Carme Pérez, Marcos Fernández, Mariano Suárez y Arturu Xosé Bermeyu, qu’ocupaba hasta agora’l cargu que garra’l que ye militante de la organización dende tiempos d’Andecha Mocedá.

Nel Conceyu Nacional tamién se punxeron “les bases pa ufiertar a les asturianes y asturianos un proyeutu políticu de tresformación social, con Asturies como marcu específicu y ufriendo una alternativa digna y viable de futuru pal pueblu asturianu”, apuntaron dende Andecha Astur. Asina aprobáronse dos “importantes documentos”: ‘Llinia política y elleiciones’, que recueye’l determín del partíu de presentase a les eleiciones municipales y Nacionales del 26 de mayu y l’aprobación de la participación n’Agora Repúbliques pa les Europees, y ‘Asturies nes tos manes. 25 principios xenerales pa un programa políticu’, que define’l marcu ideolóxicu’l del programa “al serviciu d’una Asturies socialista y soberana”.

Intervenciones de Juaristi y Llucía Fernández

Fináu’l Conceyu Nacional entamó un actu políticu abiertu, nel que la militancia, simpatizantes y públicu aconceyáu pudieron escuchar les intervenciones de Josu Juaristi y Llucía Fernández. El políticu d’EH Bildu esplicó a los presentes les xeres coles qu’anguañu tán dando forma a Agora Repúbliques, espresó’l so sofitu al analísis políticu sobre Europa que sintió nel actu de Xixón y calificó a la coalición como una propuesta digna y útil de les izquierdes que, nel Estáu español, defenden los derechos de les clases populares y la soberanía de les sos naciones.

Tamién tomó la pallabra Llucía Fernández, que criticó’l sucursalismu d’otres formaciones y presentó a Andecha Astur como una alternativa a les propuestes d’izquierda estatales, a les qu’acusó de pautar col PSOE o Foro. L’actu políticu finó col cantar ‘La flor del agua” y una espicha.

Na semeya, Suárez, Pérez y Juaristi nun momentu del Conceyu Nacional d'Andecha Astur.

Contador Estadistiques