Andecha Astur celebra Conceyu Nacional

La formación va renovar cargos de direición, va aprobar el programa eleutoral y va tratar la so incorporación a la coalición Agora Repúbliques pa les Europees de mayu.

Baxo'l lema #YeAsturies, Andecha Astur va celebrar esti sábadu na sala de conferencies del xixonés Antiguu Institutu'l so Conceyu Nacional, coles intervenciones polítiques previstes pa les 13 hores. Ésti va ser d'especial trescendencia pa la organización yá que va escoyer secretariu xeneral y va renovase la Xunta Direutiva, amás de proceder a una "perimportante renovación estatutaria pa garantizar entá más el furrulamientu democráticu y tresparente de la organización, p’ameyorar los drechos de la militancia y pa facilitar la participación de la emigración asturiana", espliquen.

Tamién va aldericase y aprobar la llinia política pa los años próximos y el programa eleutoral y les candidatures de cara a les triples eleiciones del 26 mayu. Nesi sen, va llevase a la militancia l'aprobación de la incorporación del partíu a la coalición Agora Repúbliques pa les Europees, continuación de Los Pueblos Deciden na que participaron EH Bildu (Euskadi), BNG (Galicia), Puyalón de Cuchas (Aragón), y Unión del Pueblo y Alternativa Nacionalista Canaria (Canarias).

Incorpórase y lidera ERC

Agora Repúbliques ta liderada por Esquera Republicana de Catalunya (ERC), con dos eurodiputaos anguaño, y EH Bildu, y nella participa tamién el BNG. Josu Juaristi, europarllamentariu de Los Pueblos Deciden que ta acabante de confirmar la so presencia nel Conceyu Nacional del sábadu, va dir nel puestu númberu 3 d'una llista liderada polos catalanes Oriol Junqueras y Diana Riba.

Andecha Astur ta convidada a participar na mesma, al igual qu'otres fuercies soberanistes del Estáu.