Arboleya: “Andecha Astur ye la única organización que plantega la defensa de los nuesos drechos individuales y coleutivos como pueblu”

|

El mozu y al mesmu tiempu vieyu militante del nacionalismu asturianu Paulo Arboleya Canteli (Uviéu, 1980) ye’l candidatu d’Andecha Astur nestes eleiciones. La organización acude a esta cita cola intención d’ufrir al eleutoráu una candidatura que “respete los drechos del pueblu trabayador asturianu”.

Andecha Astur ye la única fuercia soberanista que se presenta a estes Nacionales. Sicasí, seguimos ensin la tan demandada xunidá del nacionalismu asturianu.

La realidá ye que’l restu de formaciones nacionaliegues eslliéndose en proyeutos españoles diferentes. Poro, la demanda de xunidá del soberanismu ye cosa del pasáu énte la situacion actual.

¿Votar Andecha Astur ye votar Asturies?

Nós entendemos que sí, yá que somos la unica organizacion que plantega la defensa de los nuesos drechos individuales y coleutivos comu pueblu.

¿Cómo ve la situación del país?

Llaceriosa: falta d’emplegu, envieyamientu de la sociedá, emigracion forciada de la mocedá y los non tan mozos, xenocidiu cultural, clientelismu, corrupción, desaniciu mediu ambiental…Y asina un llargu etcétara.

¿Qué midíes considera más urxentes pa enderezar el rumbu?

La reconocencia de los drechos fundamentales básicos, ello ye, el drechu a una vida digna. Dempués, la reconocencia de la nuesa cultura cola fin de que nun seyan a desaniciala, asina como de los drechos politicos del pueblo trabayador asturianu. Ésos sedríen los pegoyos fundamentales.

La incorporación a la coalición Los Pueblos Deciden ta dando munches oportunidaes de denuncia a la so formación.

La rellación con EH Bildu ta dándonos la oportunidá d’algamar espacios de denuncia tanto na Xunión Europea como a nivel del Reinu d’España. Agora mesmo tamos trabayando sobre manera na estaya de llingües minorizaes n’Europa y de defensa de los problemátiques vecinales nel Parllamentu español. Pasu ente pasu vamos recoyendo trunfos al trabayu de denuncia que facemos. Tamos peragradecíos al tratu que nos dan y a la so implicacion con nós. Otra manera, esta situación fainos pensar sobre ónde tán los representantes d’Asturies estos espacios, que nun son a llevar nengún trabayu de defensa del pueblu asturianu y la so tierra.

El Musel salió otra vegada a escena estos díes pola imputación de los responsable del puertu cuando la obra d’amplicación. ¿Qué-y paez l’aprovechamientu eleutoral que tán faciendo dalgunos partíos d’un asuntu denunciáu por Andecha Astur?

La denuncia ye d’Andecha Astur pero ye tola sociedá civil asturiana la que tien que continuar esclariando esti asuntu ya intentando xulgar y condergar a los responsables. Nun ye d’estrañar que los medios de comunicación que mientres décades se dedicaron a criminalizanos quieran agora tapecenos. Ye lo mas normal na llóxica democratica española.

Esti añu nun hebo problemes cola Xunta Eleutoral pa presentar les papeletes n’asturianu. ¿Tán camudando les coses con respeuto a la llingua asturiana?

Andecha Astur yá algamó la reconocencia d’esti drechu fai unos años con sentencies favoratibles al usu de la nuesa llingua, pero nun ye d’estrañar que dientro de la realidá democrática española intenten una vegada tres d’otra  ñegate hasta les sos propies lleis.

Yá son delles les formaciones qu’incorporen la pallabra cooficialidá nos sos programes.

Esi fechu ye un ésitu en sí mesmu, peru nun podemos escaecer que delles organizaciones dicen defender la oficialida pero cuando algamen puestos de gobiernu reculen y nun-yos importa tar sentaos nes sos poltrones faltando a la pallabra que dieron y a los drechos d’esti pueblu

Pa finar, ¿qué espeutatives tien pal domingu?

Dar la posibilidá de que’l pueblu trabayador asturianu pueda votar a una candidatura que respete los sos drechos.

Contador Estadistiques