Alonso va tratar la creación de la especialidá docente cola ministra

El conseyeru d'Educación y Cultura va aconceyar esti mes con María Isabel Celaá.

El cambiu de Gobiernu en Madrid podría desbloquiar la creación de la especialidá docente de Llingua Asturiana y Gallego-asturiano, ún de los compromisos de la Federación Socialista Asturiana (FSA) pa esta llexislatura. Genaro Alonso demandara al Ministeriu d'Educación, Cultura y Deporte la modificación del real decretu 1834/2008 de Primaria y Secundaria pa encaxar, como s’algamó cola LOMCE, qu’aquelles comunidaes con llingua propia non oficial pero con implantación curricular puedan desarrollar la especialidá docente de dichu idioma, dalgo que'l PP frenó nun primer momentu alegando que l'Executivu taba en funciones y que dexó morrer mientres el primer tramu de la llexislatura actual.

La llegada del PSOE al poder fai que'l panorama cambie y abre la posibilidá a siguir el camín únicu previstu pa la creación de la especialidá ensin declarar la oficialidá del idioma, situación xurídica qu'evitaría too esti procesu. "Al marxe d'otros asuntos que puedan surdir dende agora, son prioritarios el tema de la cooperación territorial no que se refier a la escuela rural, el 0 a 3 y tamién el compromisu pendiente o'l pidimientu de la reconocencia de la especialidá d'asturianu", adelantó Alonso sobre la reunión billateral a la que se comprometió Celaá esti mes, cola fecha entovía pendiente de la axenda de la ministra d'Educación y Formación Profesional.

Semeya obra d'Armando Álvarez.