Alonso acusa al PP asturianu de presionar al ministeriu “pa entorpecer o impidir” la creación de la especialidá docente

“Naide del PSOE asturianu va llamar al ministeriu pa entorpecer o impidir la creación de la especialidá”, aseguró Genaro Alonso, qu’enantes destacara la posición “negativa y cerrada” nesti asuntu de Méndez de Vigo y Marín “cola complicidá del PP d’Asturies”. Espera atopar “disponibilidá y sensibilidá” nel Gobiernu nuevu.

Nel Plenu de la Xunta Xeneral d’esta mañana la diputada d’Izquierda Xunida (IX) Concha Masa entrugó al conseyeru d’Educación y Cultura “qué midíes ta adoptando pal reconocimientu de la especialidá docente” de Llingua Asturiana y Gallego-asturiano. Alonso respondió-y que la posición del Gobiernu “ye bien conocida” y que la perseverancia p’algamalo “va siguir siendo la mesma”.

Asina, confirmó que sigue pendiente de que la ministra nueva d’Educación, Cultura y Deporte, Isabel Celaá, comience la ronda d’alcuentros colos conseyeros del ramu, previstu nun primer momentu pa últimos de setiembre, pa tresllada-y esta reclamación y recordó como dende’l 23 d’avientu del 2015 y el 6 de marzu del 2017 aconceyara col ministru Íñigo Méndez de Vigo y el secretariu d’Estáu d’Educación, Formación Profesional y Universidaes en delles ocasiones, atopando una postura “negativa y cerrada, cola complicidá del PP d’Asturies”.

Más tarde, na so segunda intervención, destacara que “naide del PSOE asturianu va llamar al ministeriu pa entorpercer o impidir la creación de la especialidá”, y treslladó a Masa la so intención de tener pronto un calendariu pa la creación de la especialidá. Nesi sen, señaló qu’espera atopar de Celaá “disponibilidá y sensibilidá” nesti asuntu.

Modificación del Real Decretu

Masa recordara enantes a Alonso que “ye posible, ye necesario y ye la so responsabilidá” la creación de la especialidá baxo la fórmula, prevista pol Gobiernu asturianu, de modificar el real decretu 1834/2008 de Primaria y Secundaria, “l’artículu 2.2 nel casu de Primaria y el 2.3 nel de Secundaria”, pa qu’aquelles comunidaes con llingua propia non oficial pero con implantación curricular puedan desarrollar la especialidá docente de dichu idioma, tal y como s’algamó cola LOMCE. Tamién destacó la postura favoratible hacia’l plurillingüismu de la ministra y afaló al conseyeru a insistir “ensin mieu” p’algamar esti reconocimientu “de xusticia pal profesoría y de dignidá pa la llingua y la sociedá asturiana”.