“Esiste una demanda n’Infantil de Llingua Asturiana que nun s’atiende”, asegura Colodrón

“Nun se pue condicionar un derechu a la disponibilidá económica”, defende con rixu Xosé Lluis Colodrón. El responsable de Llingua Asturiana de SUATEA asegura que “esiste una demanda n’Infantil que nun s’atiende” pola falta d’enfotu de la conseyería.

Hai menos de 15 díes esti sindicatu educativu facía pública la situación del CEIP Moreda, onde 38 escolines y escolinos nun reciben clase de Llingua Asturiana a pesar de que los sos padres escoyeren esti conteníu pa los sos fíos por mor de qu’Educación y Cultura destinara una maestra al centru ayerán a media xornada. “Y ye una situación que nun sólo se dio en Morea, tamién hai escueles d’otros llugares, como Xixón o Uviéu, na mesma situación”, afirma Colodrón.

La modificación del Decretu 85/2008, de 3 de septiembre, pol que s’establez el currículu del segundu ciclu d’Educación Infantil (EI), pendiente entovía d’espublizase nel BOPA, va dexar la situación de la Llingua Asturiana nun perfil baxu, con una hora selmanal venceyada al área de Llinguaxe, Comunicación y Representación. El Sindicatu Unitariu Autónomu de Trabayadores de la Enseñanza d’Asturies (SUATEA) presentara delles enmiendes nel Conseyu Escolar d’Asturies p’ameyoralu, como la equiparación al inglés en carga horaria (hora y media), pero finalmente’l segundu borrador aprobáu perdía inclusive la implantación gradual y dexa la mesma a decisión del conseyeru de turnu.

Mientres tanto, el panorama nun cambia respeuto al cursu anterior: los centros que yá veníen dando asturianu siguen faciéndolo, mientres qu’esisten otros con demanda onde los alumnos nun reciben conocimientos de la llingua propia cola escusa del presupuestu. “Nun se pue condicionar un derechu a la disponibilidá económica”, asegura Colodrón, que recuerda que la Llei d’Usu y Promoción del Bable/Asturianu lleva 20 años en vigor ensin cumplise.

La situación en Primaria, Secundaria y Bachilleraru tampoco nun ye munchu meyor. “En Primaria hai al rodiu d’un 80 por cientu de medies xornaes, mientres que nel restu de ciclos hai un retrocesu claru”, apunta sobre unos datos que’l sindicatu ta precisamente recopilando estos díes.

Especialidá docente

Una reclamación vieya del sector educativu n’Asturies ye la creación de la especialidá docente de Llingua Asturiana, una demanda que podría tar más cerca de ser una realidá tres el cambiu de gobiernu en Madrid. Pa ello namái sería necesario la modificación del real decretu 1834/2008 de Primaria y Secundaria pa encaxar, como s’algamó cola LOMCE, qu’aquelles comunidaes con llingua propia non oficial pero con implantación curricular puedan desarrollar la especialidá docente de dichu idioma.

“La postura que caltenía’l PP ye de sobra conocía, dexando la pelota nel llau del Gobiernu d’Asturies con una oficialidá que permitiría direutamente la creación de la especialidá”, apunta Colodrón. La otra vía, la propuesta dende Asturies, debería abrise cola llegada de la ministra nueva, María Isabel Celaá, que va reunise nos díes próximos col conseyeru Genaro Alonso con esti tema como ún de los importantes a tratar.

Al respeuto, el representante de SUATEA considera que la vasca podría ser sensible al asuntu y acelerar los plazos pa que la especialidá docente sía realidá nesta llexislatura, como se comprometió la Federación Socialista Asturiana (FSA).