El PP sigue emplegando a Catalunya pa tratar d’atacar al asturianu

|
Genaro Alonso y placa d'El Bosquín plan pilotu

David González Medina cargó contra Genaro Alonso depués de la visita del conseyeru al CP El Bosquín afirmando que fai un "papel despreciable y innoble” por citar al PP como únicu partíu en contra del plan pilotu de Primaria. Una vegada más, Catalunya nun faltó nel discursu popular pa tratar d’atacar a la llingua asturiana.

El diputáu popular llegó a falar de “una campaña de desprestixu y de mentires al rodiu de la cooficialidá del bable”, destacando lo que considera un “papel despreciable y innoble del conseyeru socialista d’Educación, que pa defender no que cree dedica’l so tiempu a dir a los colexos a dicir que’l PP persigue a la llingua”. Esta cita vien pola visita d’ayeri d’Alonso a L’Entregu a una de les seis escueles que participen nel Plan Pilotu esperimental de Promoción del Usu del Asturianu pa facer vehicular l’idioma en Primaria, onde foi entrugáu por periodistes sobre dichu plan.

Asina, el conseyeru apuntó que la controversia sobre la iniciativa “tienla’l Partido Popular únicamente”, recordando la denuncia puesta pola formación liderada por Mercedes Fernández nel Tribunal Superior de Xusticia d’Asturies, de la que nun se conoz entovía sentencia. “Tamos convencíos de que’l marcu llegal vixente, la Llei d’Usu, permite perfeutamente la enseñanaza d’asturianu y n’asturianu con caráuter voluntaria puesto que la propia normativa fala de la promoción y usu del asturianu nel sistema educativu, y nun entendemos otra manera de promocionalo que nun sía usándolu, bien como llingua propia d’estudiu o como llingua d’usu vehicular pa otres materies”, aseguró Alonso.

Alternatives a Llingua Asturiana y Cultura Asturiana

“Atacar, insultar, despreciar y manipular contra los que nun piensen igual yá se vio n’otros territorios d’España, como Cataluña; por más que nos ataquen y nos señalen nun vamos retroceder nin un milímetru, y siguiremos oponiéndonos a la cooficialidá del bable, la so imposición, y con llibertá”, insistió González Medina, siguiendo la táutica del PP d’emplegar la situación catalana pa tratar d’atacar a la llingua asturiana, que llegó a citar a la Xunta pola Defensa de la Llingua Asturiana comparándola con Òmnium Cultural o l'Assemblea Nacional Catalana. El diputáu fixo estes declaraciones nuna rueda de prensa p’anunciar una proposición non de llei que se va tratar el vienres na Xunta Xeneral que busca que nel bloque de llibre configuración autonómica en Primaria s’amplie la ufierta cola intención d’arrequexar un poco más l’asignatura d’asturianu.

Nestos momentos les escolines y escolinos pueden cursar Llingua Asturiana y Lliteratuta –gallego-asturiano nel so ámbitu– o Cultura Asturiana, materia que se da en castellanu. La intención del PP ye qu’estes materies compitan tamién con una segunda llingua estranxera o con Nueves Teunoloxíes: “Nun pidimos impidir el bable nes escueles, pero les families que nun lo deseen merecen el mesmu respetu”, argumentó.

Na semeya, Alonso ayeri nel CP El Bosquín tres descubrir la placa conmemorativa instalada pola conseyería por ser un centru pioneru nel Plan Pilotu esperimental de Promoción del Usu del Asturianu.

Contador Estadistiques