Almanaque de Sebastiao Salgado

Coincidiendo col tiempu de la navidá, el Gobiernu asturianu, a través de la Conseyería d'Asuntos Sociales, acaba de firmar un conveniu en materia de solidaridá internacional cola Asociación Civil Terra, que lleva'l prestixosu fotógrafu brasileñu Sebastiao Salgado, embaxador del Movimientu de los Ensin Tierra. La fundación Terra trabaya na rexón brasileña de Minas Gerais, castigada mediuambiental y socialmente pola esplotación minera, llevando proyectos de desarrollu sostenible y mirando siempre por que les comunidaes indíxenes recuperen el so papel activu nesos llugares.Sebastiao Salgado, que foi economista primero de metese a retratar, ye un de los fotógrafos más especiales del mundu, y el so trabayu tien bien poco que ver col de los reporteros de prensa. Dende'l material qu'emplega -trabaya siempres en B/N y con cámares grandes que nun son les más amañoses pal trabayu del reporteru- hasta'l so métodu, ye un fotógrafu distintu. Salgado busca la empatía colos llugares y la xente que retrata nun procesu lentu que remata cuando esbilla les semeyes que-y paecen meyores d'ente toles que saca. Los sos trabayos valiéron-y pa llevar premios como l'Oscar Barnack, el Kodak o'l Victor Hasselblad.El Principáu nun esplica na anuncia oficial les acciones concretes en que va consistir la collaboración cola Asociación Terra, y fala de tres llinies xenerales: formación de recursos humanos, alcuentros y seminarios y ellaboración de material didáctico. De momentu, lo único qu'hai ye que la Conseyería va espublizar un almanaque coles semeyes del maestru.