Algaire trai’l Trophée Loïc Raison de talentos nuevos p’Asturies

|
Algaire nel LI Festival Interceltique de Lorient

Amás de completar dos actuaciones col públicu entregáu, mayormente bretón, nel pabellón d’Asturies nel LI Festival Intercélticu de Lorient, Algaire tamién participó nel Trophée Loïc Raison de talentos nuevos, con victoria. El cuartetu, reforzáu con batería y baxu, llegó a la final xunto a trés bandes de Breizh.

Xunto al Mac Crimmon, la delegación asturiana lleva pa casa'l Loïc Raison. Foi gracies al bon facer d’Algaire, grupu formáu poles pandereteres Iratxe Espina, Carla Miranda y Loreto Suárez, y el guitarrista Juan Yagüe, que se ganó al xuráu y al públicu bretón.

Llueu de convencer en semifinales cola so actuación de 25 minutos nel pabellón de Breizh, clasificó pa la final del sábadu xunto colos bretones Electro Bombarde Project, Digabestr y Ceol Ila. Otra bona actuación llevó a la so propuesta a rescamplar nel escenariu, hasta’l punto de llevar esti premiu de gran sonadía nel Interceltique.

Na semeya, Algaire na actuación del miércoles nel pabellón d'Asturies.

Contador Estadistiques