Algaire completa’l so gran añu col XIV Premiu Camaretá al Meyor Cantar con ‘Coral y maera’

Carla Miranda, Iratxe Espina, Loreto Suárez y Juan Yagüe, o lo que ye lo mesmo, Algaire, completen un 2022 d’ésitu y confirmación como banda col XIV Premiu Camaretá al Meyor Cantar. Foi esti sábadu na gala final de la Llaboral, na que tamién participó Dixebra y Mostru l’Horru, con ‘Coral y maera’, cantar que da nome al so primer discu.

Con lletra y música de Luis Ángel Fernández Santos, esta pieza de temática amorosa pensada con un ritmu de xota pa facela tamién baillable y llevada a terrenos más pop convenció al xuráu d’esti gallardón, que tien como recompensa 6.000 euros, la realización d’un videoclip y la divulgación de la canción nos medios de comunicación y nos eventos entamaos o promovíos pol Gobiernu, amás de nel circuitu Autores nel Camín. Un ésitu que se suma a la victoria nel Trophée Loïc Raison de talentos nuevos que se desendolca nel marcu del Festival Interceltique de Lorient o la clasificación pa la final del Folkez Blai que se celebra na población vasca d’Ermua.

Algaire, que presentó una puesta n’escena con cinco músicos más y una pareya de baille, foron los primeros en defender el so cantar nuna final qu’abrió fuera de concursu Llevólu’l Sumiciu col acompañamientu d’Anabel Santiago. Dixebra salió depués del ganador con ‘Como’l mar’, firmada por Primi Abella, bada reforzada con Lluci Palomares (Corquiéu y Muyeres) y Bárbara González-Quevedo (Alienda y Muyeres), pa poner el ramu a esta parte de la gala Mostru l’Horru ‘con ‘Fíu d’un pueblu’, con lletra de Francisco Méndez y música de Yannick Gutiérrez.

Tamién actuaron na gala Tras el Muro, proyeutu musical de Carla Armas, ganadora l’añu pasáu xunto con Rubén García con ‘El que conoz a tierra’, cantar escritu na variante senabresa del idioma. Antón García, direutor xeneral de Política Llingüística y presidente del xuráu, dio’l fallu del ganador darréu y la propia Armas encargóse d’entregar a Algaire’l troféu del XIV Premiu Camaretá al Meyor Cantar.

García rescampló na so intervención que “podemos sentinos arguyosos de ver cómo camina’l Premiu Camaretá al Meyor Cantar y cómo añu a añu los grupos faen una puesta n’escena cada vez meyor”. La gala emitióse en direuto por TPA.