Los trabayadores d’Alcoa marchen a Madrid pa defender los sos emplegos y la industria asturiana

|
Marcha trabayadores d'Alcoa a Madrid

El xueves salieron d’Avilés medio centenar de trabayadores d’Alcoa que marchen esti vienres en direición al puertu col oxetivu de llegar el 24 de xunu a la sede del Ministeriu d’Industria, Comerciu y Turismu, en Madrid. Ye la so forma de reivindicar un futuru p’Asturies, la so industria y l’emplegu na planta avilesina.

El camín ente la factoría d’Alcoa n’Avilés y la sede de la Delegación de Gobiernu estatal n’Asturies, n’Uviéu, completáronlu ayeri ente importantes amueses de solidaridá, que continuaron güei cola suma en Mieres de mineros que participaron nel 2012 na marcha a Madrid de los trabayadores del sector. Tres pasar el puertu Payares, l’oxetivu de mañana ye llegar a Lleón.

La fecha comprometida pola empresa pa caltener los emplegos, el 1 de xunetu, ta yá cerca, y les negociaciones esistentes con posibles inversores nun acaben de cristalizar. Tampoco nun llegó l’Estatutu de les Empreses Lletrointensives prometíu pol Gobiernu de Pedro Sánchez, lo que dexa entovía más nel aire la continuidá de la planta avilesina.

De nun haber novedaes, nel mes qu’entra Alcoa pasará de 312 a 91 trabayadores, al quedar actives namái les fundiciones y la torre de pasta.

Contador Estadistiques