Alarcón ganó la Vuelta a Asturies tres llegar en solitariu a Uviéu

|
Vuelta Asturies 2017

La TPA va dar esti martes un resume de 15 minutos en llingua asturiana de la ronda.

Raúl Alarcón (W52-Porto), ciclista de 31 años, algamó'l mayor ésitu de la so carrera profesional al llevar la LX Vuelta a Asturies, superando na clasificación a ún de los corredores del momentu, el colombianu Nairo Quintana (Movistar), y al veteranu Óscar Sevilla (Medellín Inder), que conformaron el podiu. El de Sax completó una ronda casi impecable, finando segundu na primer etapa con final en La Pola Ḷḷena a 22 segundos Weimar Alfonso Roldán (Medellín Inder) y na segunda tres Quintana nel Acebu nuna llegada baxo la nieve.

Sicasí, nel altu cangués algamaría'l maillot de líder con 7 segundos de ventaya col colombianu, que defendería ayeri con escelencia na xornada final n'Uviéu, llevando la etapa en solitariu superando a Sevilla en 7 segundos, segundu clasificáu de la etapa, y al del Movistar en 15, poniendo la diferencia final col segundu puestu na xeneral en 32 segundos. El so equipu, el portugués W52-Porto, llevaría tamién la clasificación por equipos.

A les 15.45 hores va emitise en TPA (16.45 hores, TPA 2) un resume en llingua asturiana de la competición, de la que s'encarga Miguel Fernandi. Esta emisión forma parte de la programación especial del ente públicu de comunicación con motivu de la XXXVIII Selmana de les Lletres Asturianes.

Contador Estadistiques