Nairo Quintana principal favoritu pa llevar la Vuelta a Asturies

|
Vuelta Asturies 2017

Entama güei cola etapa Uviéu - La Pola Ḷḷena. Va disputase dende esti sabadu hasta'l llunes.

La edición d'esti añu de la Vuelta a Asturies va tener tres etapes. El sabadu los ciclistes saldrán d'Uviéu nuna etapa con cinco puertos de 3ª categoría, l'últimu será l'Altu de Carabanzo que se xube 3 veces y ta a unos 6 kilometros de la meta en La Pola Ḷḷena. Al día siguiente tendremos la etapa reina cola meta nel Altu l'Acebu de primera categoría y pasu por dos puertos de tercera y un de segunda categoría. El llunes 1 de mayu la última etapa va salir dende Cangas del Narcea y va tener la llegada a Uviéu, nuna etapa que se supón con sprint final.

Na participación destaca la presencia nel equipu de Movistar de Nairo Quintana, que vien a disputar esta vuelta como preparación al Giro d'Italia qu'entama esti prósimu vienres 5.  Amás del Movistar, únicu equipu Worldteam que participa, van tar tres equipos continentales profesionales: el Israel Cycling Academy, Manzana Postobón y el Caja Rural-Seguros RGA que vien con Sergio Pardilla y son los principales rivales del Movistar a priori. El restu son equipos continentales con una bona representación d'equipos portugueses y la Selección Española Élite na que ta incluyíu l'unicu participante asturianu: Eduardo Pérez-Landaluce. En total van ser 20 equipos.

Contador Estadistiques