El Gobiernu destina 2,9 millones d’euros a ayudes al ociu nocherniegu

El Conseyu de Gobiernu aprobó esti vienres una convocatoria nueva d’ayudes pa compensar les perdes pola COVID-19, nesti casu de 2,9 millones destináu al ociu nocherniegu. Rexistráronse 441 positivos, xornada na qu’hebo que llamentar la muerte de 7 persones.

Autónomos, comunidaes de bienes, sociedaes civiles y ‘pymes’ del sector del ociu nocherniegu son los destinatarios de los 2.965.000 euros presupuestaos, cola posibilidá d’ampliar la cuantía en 500.000 euros más. Cada establecimientu con hasta 5 emplegaos va recibir 10.000 euros, mentes que los que cuente ncon 6 o más aumenten la cifra a 25.000 euros.

D’esta manera compénsase’l pieslle obligáu que tuvieron estos chigres ente’l 28 d’avientu y el 28 de xineru por mor de la quinta fola de COVID-19. Esti sector yá recibiera previamente ayudes por 5.880.000 euros.

231 hospitalizaos

La Conseyería de Salú informó de 441 casos nuevos ayeri. Son 128 menos que’l miércoles, cuando se comunicaron 569.

Un total de 7 persones finaron na xornada, 4 homes de 94, 85, 82 y 80 años y 3 muyeres de 92, 87 y 75. No que va d’andanciu morrieron 2.453 persones cola enfermedá causada pol coronavirus SARS-COV-2.

Hai 231 hospitalizaos, 210 en planta y 21 na UCI. Son 13 y 1 menos que’l día anterior, de manera respeutiva.

Na semeya, filera d'espera pa recibir la vacuna esta mañana nel Palaciu de Deportes de Xixón.