Bruño, editorial encargada de les traducciones al asturianu d’Astérix, fai una apuesta nueva pol idioma. Asoleya ‘El grúfalu’, llibru de la escritora inglesa Julia Donaldson que ye “un referente na lliteratura infantil actual”, esplica Xesús González Rato, responsable d’esta torna que cuenta coles ilustraciones orixinales d’Axel Scheffler.

La Casa de la Llingua del Conceyu de Corvera tien en marcha la novena edición de Veranu Lliterariu, el programa de promoción de la llectura n’asturianu ente los más mozos con sede nel Centru Sociocultural de Les Vegues. Los llunes de xunetu y agostu un escritor acude al conceyu pa celebrar un alcuentru colos sos pequeños siguidores y aldericar sobre una de les sos obres.