Piden estabilidá pa los trabayadores de la normalización llingüística

La Xunta pola Defensa de la Llingua quier que Cultura regularice'l status de les persones que trabayen nos Servicios de Normalización, equiparándolos al restu de personal.

La denuncia de l’asociación vien pola inestabilidá de los servicios, dependientes de la duración de les subvenciones de la Conceyería de Cultura, y de la propia inestabilidá de los responsables del mesmu. L'últimu casu ye’l del Serviciu de Normalización Llingüística del Conceyu de Piloña, que se va ciarrar depués de cuatro meses de funcionamientu. Pa la creación d'esti serviciu convocóse una plaza por concursu-oposición y nél ofrecíase un contratu por obra o serviciu
 
Dende la Xunta pola Defensa de la Llingua Asturiana entienden que si esti serviciu sigue abiertu y si, amás, yá tienen una subvención aprobada y concedida de la Conseyería de Cultura, “nun ye lóxico que se vuelva convocar la mesma plaza pal mesmu serviciu cuando lo normal ye que se renueve automáticamente'l contratu a la persona que trabaya”.
 
“Too ello llévanos a pensar que lo que se quier ye paralizar un serviciu xusto cuando s'abre'l plazu de subvención pa la normalización social del asturianu, únicu recursu económicu de los SNL que nun cuenten con una partida presupuestaria propia”, señalen.
 
L’asociación califica d’inalmisible que dende Cultura “se tea inorando conscientemente la realidá de que los trabayadores viven en situación de precariedá y d'inestabilidá llaboral: la so contratación depende de quién gobierne'l conceyu y de la subvención que'l Principáu da pa la contratación, ensin nengún tipu de conveniu”.
 
Amás, afirmen que nun se pue consentir qu'estos servicios tean pesllaos dellos meses al añu ente subvención y subvención, “de manera que nun se pueden desenvolver proyeutos a lo llargo'l tiempu nin se pueden facer campañes por fases y con un siguimientu, como ye esperable”.
 
Pa la Xunta ye vergonzoso que depués d'años de normalización llingüística nos conceyos, “la única esistente”, se siga faciendo de menos a les persones que trabayen nellos, “que nun cuenten con convenios llaborales nin con una partida presupuestaria propia nin del conceyu nin de l'alministración autonómica, colo que les sos actividaes dependen de los proyectos que presenten a subvención y de que la Conseyería tenga a bien conceder.
 
“Amás, nun se tienen clares cuáles son les sos funciones y les más de les veces los conceyos contrátenlos como dinamizadores culturales. Pa enriba, nun ta definíu cuál ye'l so sitiu dientro del organigrama municipal”, recuerden pa finar.
 
“Tendríemos que tener un conveniu como los bibliotecarios”
“Cuando piesllen un serviciu de normalización naide nun protesta"