“Tendríemos que tener un conveniu como los bibliotecarios”

Güei pieslla’l Serviciu de Normalización de Piloña. Paula Cristóbal, la so responsable, señala que tendríen que firmase convenios pa dar estabilidá a los Servicios y los trabayadores.

El mes d'avientu pasáu echó a andar el Serviciu de Normalización Llingüística de la Mancomunidá del Sueve, el primeru na zona oriental y qu’atiende a los conceyos de Piloña, Parres y Caravia.  La oficina asítiase na Casa la Cultura de L'Infiestu y al frente d'ella taba la esperta en Llingua Asturiana Paula Cristóbal Caso, qu’acedió a la plaza depués d'una convocatoria por concursu-oposición. El SNL abrió con una inversión inicial de 12.000 euros.
 
Depués de cuatro meses de trabayu, vuelve publicase nel BOPA otra convocatoria pal mesmu puestu. “Esta plaza convocóse por serviciu o obra, eso significa que demientres el Serviciu tea abiertu y nun se convoque una plaza de funcionariáu, o desapaeza, nun se tendría que convocar, otra vuelta, esta plaza”, señala Paula Cristóbal Caso.
 
Pa la filóloga, lo normal sería que’l Conceyu y la Conseyería firmaren unos convenios colos que se diera continuidá y estabilidá a estes places, “como pasa, por exemplu, colos y coles trabayadores de les biblioteques”.
 
Pa ella, la situación se debe a la condición d'inestabilidá que sufren los Servicios de Normalización, “onde la situación llaboral de les persones que trabayamos nellos ye absolutamente precaria, pa nós y pa los propios Servicios ensin conveniu llaboral, ensin una función definida dientro del organigrama alministrativu, ensin una partida presupuestaria propia…que lleva a que nun se dea una continuidá al trabayu que se ta desempeñando nellos”.

Paula Cristóbal lleva díes trabayando pa poder presentar a tiempu la solicitú de subvenciones pa la normalización social del asturianu y que’l Serviciu puea disponer de dalguna perra pa poder llevar alantre dalguna campaña de sensibilización social, yá que’l SNL pieslla güei y la convocatoria entamó’l pasáu día 19, “por mui rápidu que s’incorpore una persona al Serviciu nun va haber tiempu pa presentar proyeutos.

En cuatro meses de trabayu nun ye tiempu abondo pa evaluar el llabor d’un trabayu de normalización llingüística, “más cuando hai qu'echalo too a andar de cero y tol trabayu que se ta faciendo ye a coste cero”. Sicasí, nesi curtiu periodu presentóse’l Serviciu y desplicóse’l cometíu que tien a la sociedá, trabayaron na normalización toponímica, “qu'anque lleva oficializada sobre'l papel más d'añu y mediu ta too por facer”, organizaron un cursu d'alfabetización pa persones adultes en collaboración cola Academia de la Llingua, yá hai dalgún impresu del Conceyu en billingüe y la imaxe corporativa del mesmu empezará apaecer en billingüe en pocu tiempu.
 
Tamién se celebró'l Día de la Llingua materna cola firma d’un conveniu del Conceyu cola ALLA, l'oxetivu yera trabayar conxuntamente na promoción, espardimientu y dignificación social del usu del asturianu nel conceyu.

Paula Cristóbal señala que’l conveniu ta firmáu pol Conceyu, non pol Serviciu, colo que nun sabe si’l pieslle del SNL afeutará al mesmu. “Camiento qu’afeutará nos apartaos del mesmu que se fala direutamente del SNL, demientres nun lu haya nun esistirán tales collaboraciones”, apunta.