Los Reis Magos

El tiempu de Reis celebrase n'Asturies comu en casique tolos llaos onde se fae esta fiesta d'Epifanía: ye día de regalos, sobremanera pa los más críos. Anque antiguamente tamién yera día d'aguilanderos y comparses. Nel apartáu de les fiestes del Antroxu dedicamos artículos especiales a delles mazcaraes y tradiciones que se faen estos díes, comu A Reisada del conceyu d'Ibias, pero nun ta de más referver que dalgo tan conocío comu ye la famosa Cabalgata de Reis tién el so orixen nesti gustu por mazcarase, que yá empezaba pel tiempu los Difuntos y españaba colos aguilanderos de Navidá. Les mázcares, nel so aniciu, representaben les ánimes de los antepasáos que nestos meses, pensábase, aportaben al mundu los vivos, y tamién a los mostros del avernu qu'aprovechaben esta "ventana ente dos mundos" que se creía abríase concidiendo colos meses del Iviernu (los meses de la muerte, comu tenemos visto), pa apaecese a los mortales. Son antigues creyencies mui anteriores al Cristianismu, comunes a munchísimes cultures indoeuropees, sobre les que se foiren superponiendo les idees y los mitos de les nueves relixones.

La mesma Cabalgata Reis nun dexa ser un enorme baile de mazcaros, la personificación cristianizada de les ánimes del Inframundu a les que yera mester tratar bien pa que "traxeren regalos", que ye lo mesmo que trayer buena suerte y ayuda pa ser a llograr los sueños que tién toa persona.

El vezu de dexar comida la Nueche de Reis na cocina la casa, o nel llar, pa que la tomen los Magos o los sos acompañantes, yera en principiu la mesma comida que se-yos dexaba a les ánimes les nueches que visitaben la tierra (un vezu común en casique toles cultures antigues), y lo que foiren les sos cases. Nun comíen la comida "material", alimentábense de la "esencia" , el "golor", "l'arume", por eso se decía que si pela mañana la comida taba entero eso nun importaba. El carbón ye otru símbolu... lo negro, la escuridá, les tiniebles, el castigu a los malos comportamientos, o el castigu de les ánimes a los que nun se portaren bien pa con ellos.

Por eso la Navidá y toles sos fiestes caractericense por ser momentu de "propósitos d’enmienda", de ser "meyores", y de reparar los males que se hubieren podío facer.

Torner descubrió en Nembra, conceyu d'Aller, una estraña costume, na que los aguilanderos mercaben llambionaes y frutes coles perres llograes esos díes, y compraben tamién un gallu, al que mataben nun macabru xuegu de decapitación. Depués col gallu y les llambionaes armaben una gran llacuada na que yera'l centru el rapaz que foire a cortá-y la cabeza al gallu, que ye'l primeru en servise, mientres empezaben una copla qu'empezaba...

El día los Reis, siñores
la primer fiesta del añu
toos, dames y galanes
al Rei piden l'aguilando...

Estes maneres d'entamar una fartura ente collacios y amigos nun dexa d'asemeyase estrañamente a les que teníen los antíguos pueblos célticos na que'l guerreru de más valir empezaba él a servise la porción más saborgiosa de la pieza cocinada, la famosa "parte del campeón", lluéu de ser a demostrar que yera'l más arteru, hábil, y fuerte del grupu.

De toles maneres, no de adaptar a los nuevos tiempos usos, costumes, o tradiciones d'antañu siempres vamos ser partidarios de desaniciar tol martiriu o maltratu que se-yos faiga a persones y animales, esti sí ye un vezu que tien de desapacer, tantu si ye "autóctonu" o "importáu", si ye que en verdá somos una sociedá más avanzada y culta que les anteriores...