Una encuesta de Bloque-UNA da-y a la coalición representación na Xunta

El PP perpasaría al partíu de Cascos, y el PSOE podría gobernar con IU si nun esbarrumba nes ales. BA-UNA algamaría'l 3'3% de los votos y el restu de formaciones nun tendríen representación.
 

Según el citáu documento, al que tuvo accesu Europa Press, los 34 escaños de la circunscripción central repartiríense en 14 pal PSOE (37,1% d'intención de votu), 9 pal PP (25,2%), 6 pa FAC (16,4%), 4 pa IU-Verdes (12,8%) y 1 pa BA-UNA (3,3%). PAS-URAS, UPyD, Ideas y otros queden lloñe de tener representación pola circunscripción central.
La encuesta, de confirmase nes urnies, revelaría un panorama nel que la derecha dividiría los sos votos, pasando de los 15 del PP en 2007 a los 9 del PP y 6 de FAC. IU quedaría colos 4 escaños qu'algamó nes anteriores elecciones, en coalición daquella colos Verdes y Bloque, y el PSOE perdería un escañu, pasando de 15 a 14, que diría a la coalición asturianista.
Quedaríen otros 11 escaños por asignar pa completar los 45 que tien el Parllamentu asturianu, los d'oriente (5) y occidente (6), yá que l'universu de la encuesta namás cubrió la cincunscripción central. Nesti momentu nes ales el PSOE tien 6 diputaos y el PP 5. 
Si los socialistes perdieren un diputáu nes circunscripciones oriental y occidental en beneficiu de PP o FAC, podría dase una situación mui axustada na que nun existiríen mayoríes clares y qu'obligaríen a pautos mui complexos.