PP va pidir la illegalización d'EA si da cobertoria electoral "a ETA"

El vicesecretariu de Comunicación del PP, González Pons, calcó en que van pidir la illegalización de cualquier formación qu'acepte ser "el representante" de la banda nes eleiciones.

Esti anunciu vien depués de que la esquierda abertzale y Eusko Alkartasuna roblaron un alcuerdu de collaboración p’algamar la independia, afitando que diba ser siempre al traviés de víes polítiques. Amás, los dos grupos afirmaron que yera'l primer pasu d’una relación que pue finar nuna coalición.
 
Nuna rueda prensa na sede nacional del PP, tres el comité de diricción, González Pons afaló a los socialistes a esclarar porque tienen "nesti momentu dos polítiques y una fonda contradicción interna". "Por responsabilidá nun vamos afondar nesa firida, pidímos que lo esclarien y que digan a qué carta tenemos que quedar", afirmó, en referencia a los mensaxes que tán llanzando'l ministru Alfredo Pérez Rubalcaba y el presidente del PSE, Jesús Eguiguren.
  
Sorrayó que Batasuna y ETA "de nenguna manera puen presentase a les próximes eleiciones municipales nel País Vascu". Al so entender, "cualquier llista que cuenta col aval o la complicidá espresa" de Batasuna o ETA "ye una llista contaminada y que'l PP piensa que nun tendría que presentase a les eleiciones por una cuestión moral, ética y de dignidá de la democracia". Esclaró que'l PP nun ta pidiendo illegalizar a EA, sinón qu'esti partíu ta incluyíu "nel conxuntu de sigles que, si entren en contautu con Batasuna, van resultar contaminaes".