El presidente del PSE plantega que se facilite una salida a Batasuna

El presidente del PSE-EE, Jesús Eguiguren, Unvió un escritu al lehandakari, Patxi López, nel que-y plantega la posibilidá de facilitar una salida política a Batasuna si se desvincula d'ETA.

Eguiguren, que participó nes conversaciones ente'l Gobiernu y ETA mientres la última tregua (la del 2006), señala nel so escritu la posibilidá de "incentivar la evolución de la izquierda abertzale" si ésta se separa de los postulaos de la banda terrorista y condena la so violencia.

Como contrapartida si cumple colo anterior, el máximu dirixente de los socialistes vascos propón que "les instituciones vasques" se comprometan con Batasuna "a promover la incorporación de la so representación política", indica'l diariu 'El País'. L'oxetivu d'Eguiguren ye que'l mesmu lehendakari y el presidente de los populares vascos, Antonio Basagoiti, lideren dende Euskadi'l procesu que lleve a la fin definitiva de la violencia etarra.
 
El fin d'ETA, nesta llexislatura
  
Nuna reciente entrevista concedida a Europa Press, el mesmu Eguiguren mostróse convencíu de que Batasuna ganó'l "puxu" a la banda terrorista pol control de la 'izquierda abertzale' y de que'l fin d'ETA va llograse mientres el Gobiernu de José Luis Rodríguez Zapatero. "Nel so tiempu de Gobiernu -dixo- ye cuando se va a algamar la paz". "Toi convencíu", repostió.
  
Na so opinión, la organización terrorista nun ta atentando por cuenta de dellos factores, ente otros, al fechu de que nun quier dar una "tayante negativa" a los planteamientos de Batasuna y de los mediadores internacionales, asina como a los problemes loxísticos.
  
D'esta forma, el presidente de los socialistes vascos mostraba'l so desacuerdu cola reforma de la Llei Electoral que plantegó'l Gobiernu pa que Batasuna nun puea presentase a les elecciones porque, amás de considerar que "nun va facer falta", duda de que la 'izquierda abertzale' vaya a acudir con EA a los comicios.
  
"L'apuesta de Batasuna" poles víes polítiques "va en serio", defendió Eguiguren. Nesti sen, esplicó que "Batasuna caltuvo un puxu pa (llograr) la dirección política del conxuntu de la izquierda abertzale" y "nesi puxu algamó arrastrar a les sos bases" nel sent de que "nun puen ser una organización política y qu'ETA tome les sos decisiones". Esto ye, que "tienen el convencimientu" de que "precisen ser una organización autónoma d'ETA" y que la esistencia d'una organización terrorista "los perxudica".
  
Na so opinión, "esto ye un fechu" que nun quiso personalizar n'Arnaldo Otegi. "Yo diría que la xente veterano, la xente que lleva munchos años" ye la qu'a lo último "s'impunxo", matizó antes de calcar en que esto abre "otru ciclu" na llucha antiterrorista.
 
Distanciamientu dende'l PSE y el PP
  
Cuando-y pregunta Europa Press si creía que Batasuna condenaría un atentáu con víctima mortal como muestra del so distanciamientu d'ETA, Eguiguren apuntó que "una estratexa muncho más intelixente sedría que nun atentaren y nun tuvieren que condenalu". Por ello, supón que "la estratexa que tán buscando nun ye condenar, sinón que nun atenten".
  
Esti tipu de reflexones del presidente de los socialistes vascos acoyéronse con frialdá polos gobiernos central y vascu, asina como nes files del PSOE. A pesar de que negó que les posiciones de Eguiguren xeneraren "malestar", el Gobiernu vascu reafirmó la so política de "tolerancia cero" con ETA. Coles mesmes, dende'l PP vascu pidióse a los "Eguiguren de turnu" que se dediquen a combatir a ETA y nun repitan los errores del pasáu.