Galán: “Ye la llexislatura con más diputaos a favor de la oficialidá, 17 de 45”

|

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?

La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Trés de los seis partíos con representación parllamentaria na Xunta Xeneral nueva introduxeron nos sos programes eleutorales una postura favoratible a la oficialidá. ¿Podemos ser optimistes de cara a la llexislatura nueva?

Nós preferimos ser optimistes que dexase llevar pol desánimu. Ye la llexislatura con un mayor pesu de diputaos abiertamente a favor de la oficialidá, 17 de 45. En 1998 con 7 diputaos pola oficialidá, la mayor cifra hasta esti añu, consiguióse la Llei d’Usu del Asturianu. Si trabayamos bien, si facemos la presión necesaria y somos un movimientu fuerte, pueden ponese los pegoyos pa coses mui importantes pal idioma.

Si esperamos a que les coses pasen ensin más, vamos siguir igual. Optimistes, sí, pero un optimismu basáu na seguranza de que vamos facer tolo posible trabayando por ello, non esperando a que mos venga del cielu. Munches vegaes entrúguenme, ¿cuándo llegará la oficialidá? Siempres-yos respuendo que nunca, que la oficialidá nun vendrá, que tenemos que dir nós a por ella.

El martes vivióse un día históricu na Xunta Xeneral no que respeuta a la presencia de la llingua asturiana na Cámara.

Sí, la verdá qu’entamó l’actividá parllamentaria con mui bones sensaciones no que cinca a la cuestión llingüística, con una cierta sensación de que l’asturianu va tener una presencia normal nos alderiques del Plenu nestos cuatro años vinientes.

Bien ye verdá que diputaos como Xuan Xosé Sánchez Vicente, del PAS, o Roberto Colunga, del Bloque por Asturies, de forma habitual, y otros n’ocasiones concretes, davezu cuando se falaba del propiu idioma, usaron l’asturianu. Y non ensin problemes pa facelo per parte de la presidencia de la Xunta Xeneral, que nel casu de Sánchez Vicente trató de torgar qu’usara l’asturianu, con muncha polémica entós. Güei paez que yá nun s’atreven a prohibir usar l’asturianu d’una forma tan descarada.

Agora foi’l momentu de los xestos, pero vienen cuatro años que tendrán de ser el momentu pa demostrar que pue facese política n’asturianu, falando na cámara, nos mítines, énte los medios…

Por supuestu esti usu normal del idioma hai qu’acompañalu de les propuestes y midíes polítiques necesaries pa normalizar l’idioma, trabayando por un consensu políticu –porque’l social yá ta construyíu– pa reformar l’Estatutu d’Autonomía d’Asturies ya introducir la oficialidá del asturianu. Mientres, nun podemos esperar, hai que trabayar en propuestes concretes nel marcu de la Llei d’Usu del Asturianu de 1998, que da pa muncho: meyorar la presencia del asturianu nel enseñu, medios de comunicación, actividá de les instituciones, etc.

Y la ferramienta pa facelo ye un Plan de Normalización Llingüística p’Asturies pal periodu 2015-2019 que tien que se redactar y aprobar enantes de que termine l’añu, nun hai tiempu que perder.

El nuevu Gobiernu d’Asturies y los gobiernos de los conceyos tienen de poner en marcha planes de normalización efectivos que funcionen dende’l primer día. Los grupos políticos que defenden la oficialidá tienen que sentase yá a falar ya impulsar una fueya de ruta pa ver cómo consiguir convencer al restu de partíos pa que tengamos los 27 votos necesarios p’aprobar una modificación del Estatutu d’Autonomía que lleve la oficialidá.

Ye necesario tomar midíes pa visibilizar l’asturianu y cuidar los espacios más importantes, el sistema educativu, los medios de comunicación y la cuestión de los drechos civiles.

Estos díes atrás poníen en marcha dende Iniciativa pol Asturianu una campaña p’afalar a conceyales y alcaldes a xurar o prometer el cargu n’asturianu, ¿qué balance fai?

Tamos mui contentos cola respuesta porque ye la primer vegada que los xuramentos n’asturianu nun son un asuntu anecdóticu. N’alredor de 24 conceyos, y siguimos sumando, hai conceyales que xuraron el cargu n’asturianu o en gallego-asturiano.

De los que tenemos anuncia hasta agora son: Xixón, Uviéu, Mieres, Avilés, Llangréu, Siero, Mieres, Villaviciosa, Cangues d'Onís, Llanera, Bimenes, Ibias, Peñamellera Alta, Ayer, Corvera, Riosa, Sobrescobiu, Noreña, Carreño, Llaviana, Pravia, Ḷḷena, La Ribera, Avilés y Ribeseya. Pero les noticies van llegando pasu ente pasu.  

Decenes de conceyales y amás, que sepamos, dos alcaldes, el de Bimenes y la de Peñamellera Alta, xuraron n’asturianu tamién. Foi tresversal porque xuraron n’asturianu persones de cásique tolos partíos: Foro, Podemos, PSOE, Izquierda Xunida, PAS, Conceyu Abiertu, Pueblu, Agora Nava…

Ye un xestu simbólicu qu’agora esperamos convertir en compromisos concretos de trabayu pa estos cuatro años. Pa ello yá tamos contactando de nuevo con tolos conceyales a los que podemos acceder, pa venos, pa falar y proponer acciones y midíes que llevar a los plenos. Hai muncho que facer nestos cuatro años. Nun pue quedar el compromisu pol asturianu nel xuramentu.

¿Qué proyeutos tien en mente pa los trés años vinientes?

Los proyectos pasen por crecer como organización, pero non pol fechu de crecer en si, sinón por ser una ferramienta más útil pa meyorar la situación del asturianu. El llabor principal nestos años ye siguir trabayando n’ampliar la presencia del asturianu na vida diaria.

Nes instituciones trabayaremos por meyorar los marcos llegales nos que se mueve l’asturianu, mientres que col ámbitu de les entidaes privaes, siguiremos nel llabor de collaboración, faciendo por implicar a más colectivos y empreses nel usu de la llingua asturiana. Les nueves estayes puestes en marcha nel II Congresu celebráu va unes selmanes dan pistes de per ónde va dir el nuesu llabor.

¿Cuála ye l’asignatura pendiente d’Iniciativa pol Asturianu?

La gran asignatura pendiente ye salir más a la cai. Tócanos informar y convencer a cada asturianu y asturiana, unu a unu, pa que s’impliquen, pa que conozan la realidá del so propiu idioma, que tovía muncha xente desconoz. Hai munchos prexuicios, pero tamién munchu ciñu polo propio. Cada vegada que ponemos un puestu na cai y facemos esi llabor véolo na xente. Hai traumes por cómo los trataron por usar l’asturianu nes escueles, al dir a les ciudaes…

Hai prexuicios. Pero cuando fales un pocoñín con ellos, cuando-yos das argumentos serios, hai una sociedá que ye quien a quitase d’enriba esa negativid;  una sociedá muncho más namorada de la so llingua de lo que pensamos.

Esti xueves va tar en Genèva pa llevar la situación del idioma a la Organización de Naciones Xuníes.

Acudimos a Xinebra como parte de la delegación d’ELEN, l’asociación europea d’entidaes a la que pertenecemos. Llevamos un informe conxuntu de les entidaes del Estáu español, onde se recueyen los casos de discriminación del asturianu col envís de dar a conocer cómo se tán incumpliendo los Drechos Humanos no que cinca a les cuestiones llingüístiques n’Asturies.

Formamos parte d’ELEN dende la so fundación y paezmos perimportante tar nesti tipu d’alcuentros, siempres que l’axenda y el presupuestu mos lo permiten. Como representantes de la llingua asturiana n’ELEN tenemos la responsabilidá de trabayar l’ámbitu internacional y esi ye un campu que tamos trabayando, al mio xuiciu, mui bien, con Xosé B. Álvarez, que nun pue tar nesta ocasión, pero que mos asesora en too a Marissa Bordallo y a min, que sedremos los delegaos nesta ocasión.

 
¿Qué beneficios aporta a l'asturianu la so presencia nesti Conseyu sobre Derechos Humanos?

Ye un viaxe nel que vamos a dar a conocer la situación del asturianu a les Naciones Xuníes y a tolos colectivos internacionales que van tar presentes nesti 29 Conseyu del Altu Comisionáu de Drechos Humanos. Esperamos que sirva pa que la presión internacional llegue con más fuercia a Asturies y valga pa forzar pasos alantre na reconocencia de los drechos civiles de los y les asturfalantes.

Ye importante que’l Gobiernu d’España, que va tar presente nesti Conseyu, vea que la comunidá asturfalante ye fuerte y tien presencia nos ámbitos internacionales, que trabaya y llucha pol so idioma. Fuera d’Asturies nun s’entiende cómo una llingua pue tener un estatus inferior al del restu d’idiomes d’un estáu; ye una situación que ven antidemocrática y qu’atenta contra los drechos civiles.

Tamién van visitar el centru asturianu de Genèva.

Nel nuesu espíritu d’aprovechamientu de los recursos y yá que tenemos que tar ellí un día más, aprovechamos pa ponenos en contactu col centru asturianu de la ciudá, presentar Iniciativa pol Asturianu a los munchos asturianos emigraos na zona, asina como establecer pontes de collaboración pa la realización d’actividaes y el fomentu del usu del asturianu ente la comunidá asturiana en Suiza.

Ye unu de los campos que trabayaremos con enfotu na nueva direutiva. Pablo Arce, que lleva la estaya d’Asturies Esterior, tien un interesante programa de trabayu pa facer colos asturianos emigraos y los centros y cases d’Asturies pel mundu.

Pa finar, la xente que quiera collaborar con Iniciativa pol Asturianu, ¿de qué manera pue facelo?

Esperámoslos colos brazos abiertos. Tamos tol día cafiando nes redes sociales cola necesidá de que la xente se faiga socia y vamos sumando, pero mui despacín. Necesitamos más xente implicao, yá seya faciéndose sociu y aportando namás una cantidá económica o col so trabayu.

Dende 20 euros al añu y en menos de dos minutos pue asociase cualquier persona a Iniciativa pol Asturianu y recibir el carné que vamos entamar a distribuyir esti branu, con ventayes al consumir n’empreses que tamos sumando a la iniciativa. La dirección pa facese sociu ye ésta: http://www.iniciativapolasturianu.org/contautu/faite-sociu

Pa lleer la primer parte de la entrevista, calca equí.

Contador Estadistiques