Los socios d’Iniciativa pol Asturianu escueyen a Inaciu Galán como presidente de la organización

El primer congresu d’Iniciativa pol Asturianu, que tuvo llugar esti sábadu n’Uviéu, escoyó a Inaciu Galán como presidente de la organización. La xunta direutiva destaca pola mocedá de munchos de los sos integrantes.
 
Tres un procesu que dio aniciu nel mes d’ochobre tres dellos meses de conversaciones y que tuvo la so presentación pública’l 17 d’avientu, Iniciativa pol Asturianu yá dispón d’una xunta direutiva definitiva. Ésta ta formada pol periodista Inaciu Galán (Xixón, 1986), como presidente; l’estudiante de Maxisteriu y activista llingüísticu, Vítor Suárez (Uviéu, 1988), como vicepresidente; el tamién periodista Rubén Martín-Llames (Xixón, 1976), como secretariu; y la profesora Ana María Viesca Iglesias (Piloña, 1959), como ayalguera. Completen la direutiva, como vocales, Xosé B. Álvarez (Uviéu), de Rellaciones Internacionales; María Díaz Suárez (Mieres) d’Enseñu; Sabel Tuñón Ces (Xixón), de Voluntariáu; Álex Ordiales (Llangréu),d’Imaxe y Audivisuales; y Denis Soria (Uviéu), de Dominiu Llingüísticu.
 
Esta xunta direutiva salió escoyida polo socios de la organización nel primer congresu del coleutivu, celebráu’l sábadu nel Auditoriu d’Uviéu. Nél, la xunta promotora d’Iniciativa pol Asturianu que, dende la presentación de la asociación venía desendolcando trabayu de reivindicación llingüística y denuncia, presentó la Memoria 2011 col tol llabor fechu hasta’l momentu. Tamién aprobóse una ‘Fueya de ruta’ cola que se punxo les bases al trabayu de los meses vinientes y entamóse cola organización de los grupos llocales cola fin d’averar la reivindicación llingüística a les cais y instituciones del país.
 
Na semeya, d'izquierda a derecha: na primer fila, Vítor Suárez, Denis Soria y María Díaz Suárez; na segunda, Rubén Martín-Llames, Inaciu Galán y Xosé B. Álvarez.