Galán: “Ye necesario implicar a la sociedá si queremos que l’idioma tenga futuru”

Inaciu Galán y González (Xixón, 1986) entama con ilusión un mandatu nuevu de trés años al frente d’Iniciativa pol Asturianu. Asturies.com ufre la primer parte de la entrevista col escritor, que va tener continuidá’l llunes.

¿Cómo afronta esta etapa nueva na presidencia d’Iniciativa pol Asturianu?

Con ganes, sabiendo que ye pa min la segunda y última parte d’un camín qu’entamaba en 2011 cola fundación d’Iniciativa pol Asturianu. Entós tuvimos que construyir una organización de cero, dala a conocer, crear un estilu propiu y caltener esi llabor a lo llargo de trés años. Agora l’oxetivu ye dir afitando la organización, creciendo y sobre manera faciendo medrar la nuesa implantación social y capacidá d’influencia. Siguimos teniendo nidio que ye necesario implicar a la sociedá na reivindicación llingüística si queremos que l’idioma tenga futuru.

¿Foi la suya la única candidatura?

Sí. Podría dicir que ye por mor del ésitu de xestión de la organización del equipu qu’encabecé, pero creo que tien más que ver con otres razones. De mano, con que ye una organización entá mui moza y na que se trabaya de forma mui participativa. Nadie que quixera trabayar tuvo nengún pilancu pa facelo. Tamién tien que ver con que construyimos una candidatura amplia y col envís de trabayar a comuña con toles persones que tán dispuestes a dedicar parte del so tiempu a les xeres reivindicatives pol asturianu.

¿Cómo se desarrolló’l II Congresu d’Iniciativa pol Asturianu?

El Congresu foi mui asemeyáu a cualquier conceyu de la Xunta Direutiva, yá que foi compromisu dende’l principiu de la organización qu’estos aconceyamientos fueran abiertos a tolos asociaos. Siguimos echando de menos mayor implicación de los socios y nun puedo dexar d’aprovechar esta entrevista p’animar a tolos llectores d’Asturies.com a sumase a la nuesa organización, onde van tener la oportunidá y el sofitu pa trabayar naquelles estayes que-yos paezan más interesantes pa llevar alantre. Tovía güei hai muncha parte del asturianismu llingüísticu que sigue ensin implicase nel trabayu pol idioma, o pelo menos faciéndose socios. Muncha xente nun sabe lo necesario que ye tener organizaciones fuertes y amplies pa forzar a los poderes públicos y al sector priváu a tomar midíes que normalicen la llingua.

La so xunta direutiva destaca por doblar el númberu de componentes.

Sí, quiximos sumar a lo meyor de les persones que tuvieron responsabilidaes nos primeros trés años de la organización, que tienen una esperiencia que ye mui útil, con xente nuevo, qu’en munchos casos yá veníen collaborando y que lleguen con ilusión y nueves idees.

Asina, Xosé B. Álvarez siguirá al frente de les Rellaciones Internacionales, nun llabor col que consiguimos dar una mayor conocencia de la situación del asturianu n’ámbitos internacionales. Con Samuel Gradín al frente dámos-y continuidá tamién a los nuesos proyectos audiovisuales, que tienen como meyor exemplu la primer televisión 100% n’asturianu, Alderiques d’Asturies.

Otres persones importantes na organización son Teno Prau, al frente de l’Ayalguería; Rubén Martín-Llames, na Secretaría; Sabel Tuñón col Voluntariáu; y Alex Ordiales cola imaxe de la organización, que por ciertu tamos renovando dende’l Día de les Lletres, pa da-y un aire nuevo.

¿Cuáles son eses incorporaciones de vocalíes nueves?

Abrimos estayes pa meyorar el nuesu control y reivindicación sobre l’usu del asturianu nos medios con Iván Llera Huerta, una vocalía d’Activismu en Redes con Marisa Bordallo y otra de Toponimia con Mario César González. Pa da-y puxu a la nuesa presencia na cai, abrimos les estayes de Deporte, con David Valdés Llozanu; Actividaes Musicales, con Xesús Nel García; Artes Escéniques con Laura Iglesia; y Aición Social con Javier Cubero. Queremos tamién implicar a los asturianos y asturianes del esterior, estaya que va trabayar Pablo Arce. Y yá p’acabar, Xurde Menéndez ye tamién vocal, collaborando col equipu, y Xuan Fernández Bas tien agora la responsabilidá de trabayar na estaya de Formación, poniendo en marcha cursos y charres formatives.

La vocalía d’Eduación pasa a tener cuatro responsables. ¿Ye necesario trabayar de manera individual cada estaya educativa?

Sí, aumentamos tamién el pesu de la vocalía d’Enseñu, que va conformala un equipu de cuatro persones, unu pa cada nivel educativu: Alba Llaneza, Infantil y Primaria; Fonsu Martín, pa Secundaria y Bachilleratu; y Claudia Menéndez y Darío de Dios nel ámbitu de la universidá. Triplicamos esfuercios porque esti ye un tema que precisa una importante atención a la vista de los últimos ataques que, por exemplu, reducieron de 4 a 1 hora selmanal l’asturianu en Bachilleratu, la eterna reivindicación del usu del asturianu como llingua vehicular, la normalización de Llingua Asturiana como una asigntura normal –esto ye, tan obligatoria como les demás nel currículu–, la reconocencia de la especialidá d’asturianu pal profesoráu, etc.

L’oxetivu ye claru, implicar a más xente nel trabayu dirariu y xenerar mayor volume y calidá nel nuesu llabor. Camentamos que ye importante echar a andar nueves vocalíes con estayes de trabayu que se veníen tocando dende la organización pero a les que queremos dar más puxu, xunto a otres que son nueves dafechu y sobre les que queremos abrir campos que nun se tocaren.

Iniciativa pol Asturianu acumula trés años de vida. ¿Qué valoración fai del trabayu desendolcáu nesi tiempu?

La valoración ye positiva, ensin trunfalismos porque esti nun ye un camín de plazu curtiu; ye una carrera de llarga distancia. Préstame destacar qu’abrimos caminos inéditos na reivindicación llingüística, trabayando dende la protesta, pero tamién la propuesta, el diálogu con tol mundu, con tolos partíos, con tolos coleutivos y persones, ensin prexuicios. Paezme que consiguimos caltener na axenda política y de los medios la cuestión llingüística de forma más continuada.

Consiguimos caltener la independencia de la organización y como mos plantegamos dende’l principiu, nun solicitamos sovenciones o ayudes públiques. Non porque teamos en contra de qu’esistan, sinón, per un llau, pa garantizar l’apartidismu de la organización y, per otru llau, pa garantizar la so sostenibilidá nel futuru y nun tar a espenses de lo que pase coles ayudes. Asina que cada añu aprobamos un presupuestu y trabayamos mirando por aforrar hasta l’últimu euru de les aportaciones de los socios, que son la fonte principal d’ingresos. Teniendo en cuenta los escasos recursos, paezme que fuimos quien a espurrilos bien.

Tamién tuvimos les nueses torgues y les nueses desilusiones, como en toda organización. Siguimos viendo una falta d’implicación importante ente los partidarios del futuru del asturianu, camiento que por un ciertu cansanciu de muncha xente. Pero creo que demostramos que pue recuperase la ilusión trabayando, muncho meyor que quedando en casa. Tócanos salir a convencer a los munchísimos asturianos y asturianes a los que naide-yos entrugó nunca ‘¿qué quier que pase cola so llingua?’ nin-yos esplicaron que va camín de desapaecer. Y la nuesa esperiencia al salir a la cai, ye que l’apoyu social ye muncho mayor del que nos quieren facer dellos partíos y medios de comunicación.

¿Cumpliéronse los oxetivos iniciales?

Hai oxetivos que sí y otros que tán pendientes. Yo tenía claro que facía un equipu pa seis años de trabayu, al que se diríen sumando persones nueves. Y ehí siguiremos trabayando. El númberu d’oxetivos cumplíos sedrá proporcional al de persones de la organización y de fuera que se quieran sumar a trabayalos.

¿Cuál ye’l mayor ésitu de la organización hasta la fecha?

Pamidea ye un conxuntu de coses: recuperar la ilusión de muncha xente; implicar nel usu del asturianu a empreses y organizaciones que nunca ficieren usu de la llingua asturiana; reforzar la idea de que l’asturianu nun ye una cuestión partidista, sinón un patrimoniu común, llevar la reivindicación a campos poco esploraos… A vegaes los mayores ésitos nun son los más visibles, sinón los que van caltriando na xente.

Una de les iniciatives que más comentarios positivos recibió nel momentu de la so presentación foi la de ‘La empresa asturiana muévese!’. Sicasí, esta campaña nun tuvo’l percorríu que s’esperaba.

Sí, esta ye unu de los nuesos oxetivos imcumplíos hasta esti momentu. Como en toles organizaciones hai desalcueros qu’a vegaes frenen proyectos. Foi una pena, porque muncha xente de la organización dedicó esfuercios y había ilusión por llevala alantre. Pero nos próximos meses toi seguru de que podremos retomar esta inciativa –yá tamos trabayando n’ello– con una filosofía distinta, pero cumpliendo tamién colos oxetivos principales que tuvimos en mente dende la fundación de la organización, implicar a les empreses nel usu del asturianu.