Convocatories

El 12 de marzu Telón de Fondo representa la versión n’asturianu de la obra de Brian Friel “El Xuegu de Yalta”, versión a la so vez del cuentu llargu de Chejov “La dama del perrín”. Yalta, llugar de veranéu de la Rusia zarista, ye l´escenariu d´un alcuentru ente dos persones; Ana Sergueyevna y Dmitry Gurov, dambos casaos y qu’entamarán una rellación adultera.
 

La Xunta pola Defenda de la Llingua Asturiana de Xixón entama les xornaes "Llingua y Normalización". Les charres son nel local de Sestaferia, (cai Joaquín Alonso Bonet, 3) a les 20.00 hores. La primera de les charres ye "La recuperación de les races autóctones, otru exemplu normalizador", el xueves 11 de marzu. Mientres que'l día 18, van falar sobre'l procesu de normalización nos conceyos.
 

Darréu entama esti fin de selmana les II Xornaes Trabayadora Güei, Trabayadora Siempres. La organización ufierta actividaes “na llucha escontra’l patriarcáu y el machismu vixente”.
 
El vienres 5 de marzu, nel Chigre L’Ayalga de Xixón, a partir de les 20:30 hores proyeutaránse dellos curtiometraxes escontra’l machismu y abordando’l tema de la llucha escontra’l patriarcáu, el feminismu revolucionariu y la violencia machista. Depués de la proyeición habrá una espicha en L’Ayalga a precios populares.
 

Xuventú Asturianista y el PAS convoquen una concentración el sábadu 6 de marzu n'homenaxe y alcordanza d'Emilio Robles Muñiz, más conocíu col nomatu de ‘Pachín de Melás’.
 
La cita ye a les 12.30 na cai Avelino González Mallada, onde l'antigua cárcele del barriu xixonés d'El Coto, na que Pachín de Melás morrió, “xunto a los demás represaliaos na historia d’Asturies pola defensa de la democracia, el progresu social y económicu y l'identidá asturiana, pa lluchar escontra l'escaezu de los nuesos paisanos y del so exemplu de sacrificiu”, señalen dende la organización.