II Xornaes Trabayadora Güei, Trabayadora Siempres

Darréu entama esti fin de selmana les II Xornaes Trabayadora Güei, Trabayadora Siempres. La organización ufierta actividaes “na llucha escontra’l patriarcáu y el machismu vixente”.
 
El vienres 5 de marzu, nel Chigre L’Ayalga de Xixón, a partir de les 20:30 hores proyeutaránse dellos curtiometraxes escontra’l machismu y abordando’l tema de la llucha escontra’l patriarcáu, el feminismu revolucionariu y la violencia machista. Depués de la proyeición habrá una espicha en L’Ayalga a precios populares.
 
El sábadu 6 siguen les actividaes d'estes xornaes. Por un llau, a les 12:00, en La Felguera fadráse un mural reivindicativu. De tarde, en Xixón, Darréu entama una riestra de charres-alderique nos llocales de la Corriente Sindical d’Izquierda, na Casa Sindical. Les charres, que zarrarán les xornaes tarán orientaes a la situación de los movimientos feministes y les diferentes visiones del feminismu, dende’l marcu xuvenil al marcu sindical o llaboral. Asina Darréu quier guetar un espaciu abiertu p’aldericar sobre les problemátiques d’anguaño "na sociedá patriarcal na que vivimos".
 
Con estes xornaes dende Darréu quieren ufiertar a la ciudadana asturiana, “un espaciu escontra los roles machistes y sexistes que vivimos n’actualidá dientro’l modelu capitalista, tamién queremos reivindicar como de toos la llucha que caltienen munches muyeres y homes pa finar con esta sociedá sexista, patriarcal y esplotadora”.