Convocatories

Darréu entama esti vienres 11 d'avientu, en L'Ayalga (Xixón) una proyeición  del documental "Ochobre'l 34: memories d'un país" y una espicha. El documental foi presentáu nel Día de la Mocedá Revolucionario 2009 y trata sobre la Revolución Obrera d'Asturies de 1934. Con esti documental, xestionáu y producíu totalmente por Darréu, quieren remenbrar l'ochobre de 1934 nel so 75 aniversariu. La proyeición entamará de magar les 20:00 hores y dempués cellebraráse una espicha con precios populares. L'enfotu de Darréu ye creyar un espaciu d'alderique y compañerismu.
 

El Nuevu Teatru La Felguera va acoyer mañana sábadu 5 d’avientu a les 20:15 hores , la obra L’Encierru. Esti estrenu coincide cola entrega de la medaya de plata que l’Ayuntamientu de LLangréu concede al Grupu Teatru Kumen pola so trayectoria enriba les tables, más de 20 años de trabayu y 50 obres de teatru estrenaes

El próximu xueves 3 d’avientu, el grupu d’opinión Algamar, entama a les siete de la tarde, nel Salón d’Actos de la Casa de Cultura de La Pola Siero, una conferencia sobre la política enerxética n’Asturies. Dempués, va proyéctase un documental sobre’l tema y darréu vendrá un alderique presentáu por un miembru de la Coordinadora Ecoloxista d’Asturies y representantes vecinales de La Malpica (Carbayín) y El Solanu (El Remediu).

L'ún d'avientu celébrase'l Día Mundial de Llucha contra'l SIDA. El Comité Ciudadanu Antisida d'Asturies convoca una riestra d'actividaes en Xixón:
 

• Carpa informativa na cai Corrida esquina con plaza Seis d'Agostu. De 10:00 a 18:00 hores
• Cadena Humana que partirá a les 20:00 hores de la Escalerona hasta la plaza del Conceyu.
• Llectura del manifiestu al finalizar la Cadena Humana