El Partíu Popular Européu suma 212 de los 751 europarllamentarios

|
Los partíos demócrates-cristianos del grupu del Partíu Popular Européu sumen un total de 212 europarllamentarios (28,23 por cientu), por 185 (24,63) de los socialdemócrates. La participación a nivel européu foi del 43,09 por cientu.
 
En comparanza colos resultaos d’hai cinco años –que tuvo una mesma participación–, los populares perdieron 62 escaños (35,77 por cientu nel 2009) y los socialdemócrates ganaron 11 (25,59 por cientu). El tercer grupu más importante ye’l de l’Allianza de los Demócrates y Lliberales por Europa, con 71 escaños (9,45 por cientu), siguíos por Los Verdes/Allianza Llibre Europea, con 55 (7,32); Izquierda Xunitaria Europea/Izquierda Verde Nórdica, con 45 (5,99); Conservadores y Reformistes Europeos, con 40 (5,33); y Europa de la Llibertá y la Democracia, con 36 (4,79). Los non inscritos sumen el 5,33 por cientu de los votos (40 escaños) y hai 67 candidatos nuevos que nun pertenecen a nengún grupu políticu del Parllamentu saliente.
 
La configuración del Parllamentu nuevu ta prevista pal 1 de xunetu. Les condiciones pa formar grupu parllamentariu ye agrupar más de 25 europarllamentarios pertenecientes, como mínimo, a siete estaos miembros de la Xunión Europea.
 
Resultaos nel Estáu
 
De los 54 escaños que correspuenden al Estáu, 17 pasaríen al grupu del Partíu Popular Européu, los 16 del PP y ún de los 3 de Coalicion Europea, diendo los otos dos a l'Allianza de los Demócrates y Lliberales por Europa. Los 14 del PSOE van pa l'Allianza Progresista de Socialistes y Demócrates nel Parllamentu Européu, mentes que Los Verdes/Allianza Llibre Europea recueyen 5: 1 de La Izquierda Plural (los otros 5 van pa la Izquierda Xunitaria Europea/Izquierda Verde Nórdica), los 2 de L'Esquerra pel Dret a Decidir y el de Los Pueblos Deciden y Primavera Europea.
 
UPyD (4) taría encuadrada en los non inscritos y Podemos (5) y Ciudadanos (2), nel grupu de candidatos nuevos.
 
Conteníu especial: 
Contador Estadistiques