Ya igual Areces tenía razón

 

Ye perduro y complicao volver escribir nesti espaciu de pensamientu asturianista dempués de los resultaos de les elecciones del pasáu 22 de mayu. Unos resultaos probetayos pal nuesu trabayu ya ilusión que nun se correspuenden col trabayu desendolcáu na campaña.

 

Munches vegaes ye bien difícil amosar a la sociedá asturiana los programes qu'un partíu como'l nuesu ufierta, un movimientu que nun cunta cola estructura nin colos medios colos que cunten otros.

 

Hai un refrán que diz que “el tiempu pon a caún nel so llugar” y verdaderamente ye asina. Dempués de munchos años de l'aprobación de la Llei d’Usu (y la campaña que se fixo contra l'únicu partíu nacionalista qu'había na Xunta Xeneral), una llei más criticada que criticable, vemos como a día de güei foi un gran llogru pa la nuesa llingua, siendo l'únicu instrumentu llegal que protexe al asturianu.

 

Mientres 10 años de gobiernu del PSOE vimos el cambiu. Naquel momentu nel que los asturianos sabíen lo que yera tener un partíu propiu, al serviciu de los asturianos, que lluchaba pola identidá d’Asturies… pasamos a nun tener nada.

 

Pero esti partíu dedicóse a más coses qu'a protexer a la llingua. Mientres esos años que s'apautaron los presupuestos, tamién se fixo una política económica única dende la democracia, cola creación de nuevos empleos y l'apertura d'empreses (per primer vegada na hestoria'l númberu de paraos baxó de 50.000), hubo grandes meyores n'infraestructures como l'Autovía Minera… Too ello consiguióse faciendo una política al serviciu de los ciudadanos asturianos.

 

Esos son dalgunos de los ésitos del trabayu realizáu mientres esos años, especialmente na llexislatura 95-99, tendríamos que sentinos arguyosos de les polítiques y los frutos consiguíos pol nacionalismu institucional.

 

Por too ello, vemos que cuando una opción nacionalista puede influyir a la d'apautar y ellaborar unos presupuestos esto beneficia a tolos ciudadanos, nun solo a los falantes d’asturianu o a los cantantes de tonada, sinón al conxuntu de la sociedá que vive y trabaya en Asturies conformando esti país.

 

Pa rematar, creo que tenemos d'atalantar sobre qué rumbu debemos de llevar, si hai marineros dispuestos a remar y sobremanera si merez siguir trabayando y bregando cuando los resultaos nun son los esperaos.