¿Y si marca’l Sporting?

Yá hai munchos años que’l fútbol dexó de ser pa los aficionaos. Bono, sí, tovía sigue siéndolo, pero sólo p’aquellos de salón que paguen por ver los partíos per televisión, seguramente siguiendo a dalgún de los equipos nomaos ‘grandes’. Ye pa lo que la LFP trabaya, por muncho que Javier Tebas diga lo contrario. Un exemplu nuevu de lo que poco pinten los aficionaos nel fútbol actual ye l’ataque que tán viviendo los siguidores del Sporting esta selmana por parte del Celta ensin que nengún organismo moviera entovía un deu.

La historia tien una esplicación bien cenciella. Balaídos ta n’obres, lo que lleva al Celta a reubicar a los socios afeutaos na zona acotada a l’afición visitante mientres éstes se desendolquen. El Sporting, como ye habitual, xestiona entraes pa los sos aficionaos col club vigués, que tresllada a los xixoneses que namái pue unviar 200 pese a que la demanda taría cercana a les 2.000. Énte esta situación, al entender que nun podría facer un repartu equitativu, el Sporting refuga xestionales. El sentíu común fai pensar qu’éstes quedaríen a la venta na puerta pa que los siguidores roxiblancos que quixeran pudieran mercales nel mesmu campu.

Sicasí, el llunes, cuando se punxeron les entraes a la venta, el Celta sorprendió a toos col testu siguiente na so páxina web: “Por motivos de seguridad esta jornada no habrá venta online y en las taquillas sólo se despacharán entradas a aficionados del Real Club Celta”. Esi mesmu día una amiga mostrábame una semeya de les entraes que-y mercaren unos amigos de la familia a los sos padres pal partíu del sábadu. Nelles, puesto con bolígrafu: ‘Entrada exclusiva aficionados R. C. Celta’. Lo nunca visto.

La indignación y la reaición nun se fixo esperar ente l’afición sportinguista. Dos decenes de peña contaben con reserva d’hotel fecha –y pagada– dende hai tiempu y víen cómo’l Celta-yos zarraba les puertes del estadiu. Tamién la hostelería de Vigo amosaba la so disconformidá cola midida tomada pol club llocal. Guerra de comunicaos ente dambes entidaes y l’anuncia del Sporting de que nun diba a haber representación institucional el sábadu por respetu a los sos siguidores. Por fin, un aciertu del conseyu d’alministración, que nun se destaca por tomar decisiones acertaes nos últimos venti años.

El casu ye que’l sábadu va haber cerca d’un millar de siguidores del Sporting en Balaídos que viaxen por tener pagao l’hotel, pero que nun van poder acceder al campu con distintivos roxiblancos por motivos de seguridá. Con respeto, pero menuda babayada. ¿Podrán celebrar los goles nel casu de que los de Mareo acierten cola portería defendida por Sergio Álvarez? ¿Espulsaránlos del campu nesi casu? ¿Deberán quedar sentaos? Ye bien conocío que los incidentes del fútbol se dan de puertes a fuera de los estadios, non dientro, y quiénes lo protagonicen. Nun ye xusto que por cuatro descerebraos paguemos tolos aficionaos. Y muncho menos que la LFP o’l Conseyu Superior de Deportes miren pa otru llau.

Y ye qu’esta situación nun ye nueva. Yá pasó la temporada pasada n’Alcorcón nun partíu de miércoles, cuando la Policía obligó a l’afición del Sporting –la mayoría ‘lleendes urbanes’ en Madrid– que nun contaben con entrada pa la zona visitante a tener que meter nun contenedor bufandes y camisetes si queríen entrar en Santo Domingo. Tamién esta mesma temporada n’A Coruña, cuando’l Deportivo avisó de la posibilidá de que nun se dexaría acceder a aficionaos del Sporting con distintivos fuera de la zona visitante.

Esti branu tuvi la posibilidá d’acudir a Anoeta a ver el Real Sociedad-Sporting y en tribuna hebo muncha xente con camisetes del equipu xixonés conviviendo con total normalidá cola afición llocal, al igual que na previa nos chigres cercanos al campu donostiarra. Al día siguiente repetí sesión futbolera con un collaciu del Uviéu en Mendizorrotza nel partíu de los carbayones frente al Alavés, onde se dio la mesma situación. Y esti mesmu domingu, un grupín d’aficionaos del Levante celebraron los trés goles del so equipu nuna esquina Tribunona ensin nengún problema nin incidente.

N’Anoeta, el bon clima esistente enantes y mientres el partíu frayóse cuando, al rodiu del minutu 15, un grupu d’aficionaos politizaos entraron a la zona visitante, bien guardaos pola Ertzaintza, armando baruyu. Ye entendible que’l Celta quiera evitar la so presencia en Balaídos, pero non por ello ha de tomar estes midíes tan drástiques col restu de l’afición, que nun se carauteriza por entamar incidentes. Con estes decisiones, y otros casos bien conocíos pola viaxera afición sportinguista como l’aumentu de precios en visites del Sporting –mesmamenque les entraes n’Anoeta yeren 5 euros más cares que pal siguiente partíu de la Real como llocal, contra l’Espanyol–, lo que tán faciendo ye terminar por cansar al aficionáu y, poro, vaciar los campos de fútbol más de lo que tán yá. El defensa celtinha Cabral, arxentín, sabe lo que diz al venir d’un país onde’l fútbol ye un espectáculu na cancha y na grada: “El folclore del fútbol es ver a las dos aficiones cantando en el estadio alentando cada una a su equipo”. El sábadu nun se dará esta situación en Balaídos. Una nueva derrota del fútbol.