Una ventana abierta hacia la igualdá

Les entidaes que firmen esti artículu son organizaciones que trabayen pola normalización de les llingües minoritaries nel Estáu Español. Incidimos nes nueses sociedaes con diferentes proyectos ya iniciatives pa consiguir, ente otros oxetivos, el drechu a vivir na llingua de los nuesos territorios.

Somos conscientes de que la iniciativa social ha dir acompañada de polítiques llingüístiques y de midíes efectives. Por eso, dende va dos años, decidimos poner en marcha una iniciativa conxunta col oxetivu d’incluyir nel alderique políticu la garantía de los drechos llingüísticos nos nuesos territorios cola presentación del documentu Pluralidá llingüística: llibertá, igualdá y democracia nel que facíamos un llamáu a los partíos políticos a asumir los principios d’igualdá llingüística pa garantizar una sociedá xusta, verdaderamente plural y democrática colos mesmos drechos y deberes pa toos y toes.

Como resultáu, diez organizaciones polítiques sofitaren estes demandes presentando una Proposición Non de Llei n’avientu sobre la que s'aldericó nel Congresu de los Diputaos el pasáu 9 de marzu.

El 45% de los habitantes del Estáu vive en territorios con una llingua propia distinta del castellán. Lloñe d’un simple fechu estadísticu, na práctica, la realidá oblíganos al usu del castellán pa cumplir obligaciones, pa satisfacer necesidaes y pa que mos seyan respetaos otros drechos. L’usu de les nueses llingües siempres atopa cola muria de la esclusión, de la coerción, del vetu, de la inesistencia, de la invisibilidá o de condiciones imposibles al abellugu del Boletín Oficial del Estáu.

Dende la Declaración Universal de los Drechos Humanos hasta la Declaración Universal de los Drechos Llingüísticos, dende’l Pautu Internacional de Drechos Civiles y Políticos hasta la Carta Europea de les Llingües Rexonales o Minoritaries, alcuerdos internacionales colos que se compromete l’Estáu Español, coinciden que tolos pueblos y les comunidaes llingüístiques, iguales en capacidaes, tamién ham ser iguales nel drechu a realizar toles actividaes humanes na llingua propia. Igualdá, llibertá y democracia con voluntá d’exerciciu.

La voluntá de les entidaes sociales de dialogar y de llegar a un alcuerdu, aceptando toles propuestes alternatives a la nuesa cola única condición de tener como base la igualdá de toles comunidaes llingüístiques y la voluntá de ponela en práctica ya implementar acciones concretes, atopóse, per un llau, un PP que presentaba una enmienda que reconocía la necesidá d’igualdá de drechos y deberes pero que siguía manteniendo llendes que vaciaben la propuesta de voluntá práctica y, de la otra, alcontróse a un PSOE alloñáu de la reconocencia más básica de la plena igualdá de toles llingües qu’hai nel estáu.

El fechu de que los dos partíos que tuvieron al frente del Estáu nos 40 años caberos anecien na so posición habitual, nun permitió alcanzar un compromisu en tolos puntos de la propuesta que permita pasar de la política de declaraciones d’intenciones na executiva y, en consecuencia, dar plena validez a los pautos firmaos pol mesmo Estáu, a pesar de que fueren aprobaes trés de las midíes contemplaes.

Nun tenemos nenguna duda de que foi gracies a la presión de los axentes sociales que, inclusive con un resultáu insuficiente, consiguimos abrir de nuevo l'alderique, sentase y falar colos que taben dispuestos a ello. Definimos el camín y consiguimos que axentes políticos nuevos, hasta agora impermeables a demandes tan fuertes y tan necesaries pa les nueses sociedaes.

Abrimos una ventana, pero’l futuru de les nueses llingües necesita abrir munches más y qu’enxamás se vuelvan a pesllar. Vamos insistir y vamos siguir actuando dende les nueses realidaes diverses, pero tamién coordinaos en tolos espacios que podamos en cata d’una democracia real que refugue toles formes de racismu, incluyíu'l llingüísticu, que desprecia, esclúi y discrimina a los ciudadanos que se caltienen como miembros d’una comunidá llingüística.

Nagüamos vivir n’asturianu! Queremos vivir en galego! Euskaraz bizi nahi dut! Volem viure en català! Queremos vivir en aragonés!

A Mesa Pola Normalización Lingüística, Eukalgintzaren Kontseilua, Iniciativa Pol Asturianu, Asociación Cultural Nogará, Acció Cultural del País Valencià, el CIEMEN, Escola Valenciana, Obra Cultural Balear i Òmnium Cultural, y Plataforma per la Llengua.