Un tiempu pa facer camín

La vida de les persones y los pueblos ye un camín que vamos faciendo al andar. Naide, nin la más poderosa nin la más humilde, tien el futuru escrito en piedra. Nesi camín hai finxos que vamos algamando y que valen pa tomar una posa, descansar y celebrar. El pueblu asturianu tien nel 25 de mayu y nesta fecha del 8 de setiembre dos d’esos finxos históricos.

Por eso esti ye un día afayadizu pa esfrutar la música de Nacho Vegas y Sandrasian d’Abres, la espicha, el baille, los xuegos, pintacares y cuentacuentos. Pero tamién lo ye pa echar la vista atrás y sopelexar con David Guardado y el so ensayu, ‘Nunca Vencida’, el camín andáu, amás de pa imaxinar los pasos siguientes coles compañeres Silvia Fernández, Iyán Glez. y Claudia González.

Dende’l minutu cero de la fundación d’Aína, y primero, teníemos nidio que ye dable facer camín pa una Asturies del sieglu XXI y que la fundación del partíu, en sigo mesma, yera un primer pasu nesi sen. Ye dalgo que pasó hai unos meses y yá andamos xuntes más de 200 persones de 33 conceyos d’Asturies. Somos munches y faen falta munches más porque nun somos vendedores de fumu que quieran convencer a los y les asturianes de tener una vara máxica cola que solucionar tolos problemes d’Asturies.

Nun tenemos una vara máxica cola qu’acabar cola contaminación y el cambéu climáticu, col desempléu, cola desigualdá de recursos, col desequilibriu nel desarrollu y bientar ente conceyos del país, col racismo y la xenofobia, col machismu, col autoodiu y el desconocimientu de nós mesmos, cola insolidaridá y la inxusticia, cola emigración de la mocedá, cola soledá de los más mayores y de los que cadecen dalguna condición física o mental, coles necesidaes y carencies del sistema educativu y tolos demás servicios públicos.

Porque la vida ye un camín qu’hai qu’andar independientemente del destín, sabemos que nunca vamos acabar ensembre colos problemes y dificultaes, pero que con trabayu, enfotu y ilusión podemos dir poniendo les bases pa una sociedá xusta y solidaria, onde les persones que nacieron nesti país astur y les qu’escoyeron vivir equí seyan pa llevar una vida digna.

Pa ello ye menester trabayar d’abaxo p’arriba, afalando que les persones y les comunidaes, dende les aldees y los barrios, se faigan responsables de les sos vides diaries y los sos recursos, que seyan pa tomar les decisiones que meyor s’afayen a les sos circunstancies vitales y comunitaries. Esto ye, que seyan soberanes. Namás…, y ná menos. Nun ye fácil, pero les úniques coses imposibles son les que nun s’intenten. Y si güei tamos equí esti día, xuntes n’Aína, ye porque nun pensamos danos, porque la nuestra idea ye la d’una patria de xusticia, igualdá y solidaridá Nunca Vencida onde cabemos toes.

Lluís Aique Iglesias Fernández ye miembru de la Mesa Nacional d'Aína.