Un pasu más construyendo l’alternativa

El pasáu 8 de setiembre recordaréis que punximos en marcha una plataforma, la Plataforma Unitaria 8 de setiembre dende la que fiximos una convocatoria na que falábemos de que n’Asturies taba abriéndose un ciclu políticu nuevu, y facíemos una llamada a la construcción, pa esi tiempu nuevu, d’un referente plural, dende la izquierda, dende l'asturianismu y dende l'ecoloxismu". Esi procesu llevónos a unes elecciones el pasáu mes de mayu nel que punximos el primer pegoyu pa la construcción d’un referente de rexeneración política d’esti país frente a unos proyectos que nun aportaben nin aporten nenguna solución nin rempuesta a los graves problemes d’Asturies.

 

Un añu más tarde podemos dicir qu’esi cambiu de ciclu del que falábemos yá entamó.

 

L’Asturies que tenemos anguaño ye mui distinta y dende les fuerces d’izquierda asturianes, (d’izquierda y asturianes, polo tanto nun tamos falando nin del PSOE nin d’IU), tenemos que dar una rempuesta y una alternativa afayadiza.

 

L’actual situación política, la que nos dexó la última convocatoria electoral con un gobiernu de Foro Asturias, namás que fai que reafirmar lo necesario de la nuestra propuesta énte una situación na que’l PSOE y IU namás son quien a ufiertar más de lo mesmo, la vuelta al réxime anterior, y el PP nin ta nin lu esperen.

 

Nesti nuevu tiempu tenemos un actor nuevu na política asturiana, el Foro Asturias Ciudadanos de Álvarez-Cascos, un partíu que supo canalizar nes elecciones una parte perimportante del descontentu cola situación y cola marxinación d’Asturies y que con una base na derecha foi quien a llegar a otros sectores.

 

La irrupción del Foro, y la so vocación de partíu asturianu (vocación asturiana en principiu, porque yá tamos viendo cómo se van presentar en Madrid) paez qu'abrió una perspectiva nueva nunes elecciones onde Asturies apaez como suxetu políticu, y aparte del votu del PP, incluso foi a arramplar una parte de votu asturianista o de persones que se consideren d’izquierdes y que vieron como prioritariu un cambiu, fuera cual fuera y traxéralu quien lu traxera, anque fuera Cascos…

 

¿Y Cuála ye la política de Foro?

 

Tamos entamando a vela, anque nun ta siendo fácil porque si Cascos anunciaba que trabayaben a 3 turnos antes de les elecciones, lo que tamos viendo hasta’l momentu ye poco más qu’unos servicios mínimos y una indefinición de propuestes, planes y decisiones.

 

Tal parez qu’el partíu del gobiernu y el so presidente,  como decíamos ya va unos díes, ta en campaña ellectoral permanente dende les elecciones del mes de mayu.

 

Llevamos meses viéndolo nes valles publicitaries per toa Asturies y acabamos de velo entá con más claridá col anunciu de que Foro tien pensao presentar candidatura en  Madrid. Una cosa, y non porque lo diga Cospedal nesti casu vamos dexar de coincidir con ella, que ye chocante pa un partíu asturianu, y más cuando una de les razones que se dan ye, según fontes del propiu Foro, “pa que nos voten los madrilanos que pasen el branu n’Asturies”.

 

Paecería una broma si nun fuera una nota oficial, y sedría incomprensible si tres d’esta operación nun s’escuende una llucha de fondu dientro de la derecha española, y una operación na que pa Cascos Asturies ye namás una posición ganada y una cabeza de ponte pa dar el saltu a la política española otra vuelta.

 

Hasta agora tamos viendo poques coses, pero munches de les que vemos nun nos gusten nada y faenos albidrar una acción de gobiernu basada nes privatizaciones, en recortes que nun parecen fundamentase precisamente na tan traida y llevada austeridá, en polítiques que reproducen zunes y comportamientos del PSOE (como la designación de cargos) o na relaxación na protección del nuestru mediu ambiente (como na so postura de recuperación del trazáu inicial de Sama-Velilla).

 

 La propuesta de retomar un trazáu pa la llinia Sama Velilla que ya foi rechazada en su día polos tribunales, l’apoyu a la incineradora, o’l caltenimientu de la llibre designación pa la elección de cargos, ye dicir “el deu” que tanto criticaron a Areces y qu’amás contradiz el so programa son males señales. Por nun falar d’actuaciones locales como nel conceyu de Xixón onde se suprime l’ayuda a la investigación de la memoria histórica o iniciatives de solidaridá.

 

En cuantes al discursu Foro Asturias, tamos viéndolo. Ta introduciendo na política asturiana una versión adaptada del cuadonguismu clásicu. Y dende esa visión nun se pue dar respuesta a les necesidades reales d’Asturies porque parte d’una visión subordinada, d’una Asturies que solo s’esplica como parte d’una entidá superior y que nun decide soberanamente’l so futuru y esixe los sos derechos, sinon que vuelve a ufiertase como contención ente los “escesos nacionalistes”.

 

 

Porque nun podemos escaecer cuálos son los referentes históricos de Cascos cuando se declara rexonalista o rexeneracionista; los de la Doctrina Asturianista, excluyendo por ello tola tradición más reivindicable y moderna del asturianismu representáu pol republicanismu federal y tol discursu asturianista que se crea dende 1974 cola aparición de Conceyu Bable, que Cascos nun incorpora como referencia, daqué impensable nuna fuerza asturianista creíble.

 

Mientres,  la oposición representada na Xunta Xeneral vuelve a nun sirvir como impulsor d’un discursu alternativu, y namás que sabe reclamar, nel casu FSA-IU, les bondaes del rexime anterior (esi mesmu rexime que los llevó fuera del gobiernu pol cansanciu de los asturianos y asturianes) o nel casu del PP que tien abondo con facer malabarismos p’asegurar que FAC nun lu fagocite.

 

Los grupos políticos que representaban el conformismu, la resignación cola situación relegada d’esti país y el despreciu y la falta de compromisu pa coles señes d’identidá d’Asturies siguen ehí, con otros nomes, con otru repartu d’escaños, pero siguen ehí.
Y cuestiones prioritaries como la reforma del estatutu y la reconocencia de derechos sociales y culturales, como la oficialidá de la llingua asturiana, van quedar pa prau otra llexislatura.

 

Amás nun podemos escaecer el contestu nel que tamos. N’Asturies, igual qu’en tol mundu y nel nuesu entornu sociopolíticu y económicu, tán viniendose tiempos duros.

 

La crisis nun paez que vaya tornar, y la voracidá de los llamaos mercaos ye la coartada perfecta pal recorte de derechos sociales y pa condergar a la precariedá y la probitú a les clases populares, y tamién pa poner nun segundu planu tolo que tenga que ver cola cultura, identidá o mediu ambiente.

 

Énte una situación asina fai falta más solidaridá que nunca, más defensa de los derechos que nunca, más sanidá y educación pública que nunca, más ecoloxismu que nunca y facer más país que nunca. Una Asturies meyor, afitada nos valores de solidaridá y de llucha pola xusticia que siempre foron una seña d’identidá inseparable del nuestru pueblu.

 

Por eso, pa los que nun-yos valió antes de les elecciones una política que relegaba Asturies a la inexistencia y  a la mayoría social al recorte de derechos sociales, pero tampoco-yos val una Asturies casposa y cuadonguista que renuncia a una parte perimportante de la so identidá, a la solidaridá y a les polítiques sociales, ye más importante que nunca ufiertar una alternativa.

 

Una alternativa que sirva p’atropar a los que nun-yos gustaba’l réxime que tuvimos durante casi 30 años, pero que nun-yos val tampoco una derecha seudorrexonalista qu’aplique recetes neolliberales. Y pa eso necesitamos una propuesta de construcción y de debate pa que podamos alcontranos y trabayar xuntos.

 

El 8 setiembre vuelve a xuntanos, un añu más tarde somos exemplu de coherencia demostrando que siguimos faciendo un apueste por esti camín de collaboración ente Unidá Nacionalista Asturiana y Bloque por Asturies. Que sabiendo quién somos, y a onde queremos llegar el desanimu nun ye una opción, y que col sofitu, trabayu, y sobre too'l compromisu de muncha xente, vamos construyir la opción política asturiana que queremos.

 

Yolanda González Huergo

Portavoz de la Executiva Nacional d’Unidá Nacionalista Asturiana (UNA).