Rozar

Pablo M. Testa's picture

Hai xente que se dedica abrir llocales de "partíu" y xente que se dedica abrir llocales culturales y sociales. Hai xente que fai furrular les coses como si fuere'l KKE nos sos piores tiempos, y otros que pretenden construyir país, colos sos erros y aciertos.

Hai xente que piensa que desplazar, callar o afogar voces contraries al so criteriu ye positivo: el que lo fai, por riegla xeneral, termina quedando namái que pa cuchu. Sinón ceo, sero, pero coincide que siempres en dalgún puntu la hestoria, asina asocede.

Fíxense cómo debe ser la cosa d'absurda que quien pretendía ser cabeza llista d'Asturies, siendo coordinadora, nun s'apresentó pa nun morrer políticamente. Pero sacrificó absurdamente a una persona pervaliosa, que cumple la función amás importante de secretaria d'Organización. Y claro ye que poner n'escena a una secretaria d'Organización, pa que llueu la organización decida nun la sofitar, queda un tanto estravagante. Tampoco s'apresentó a esa eleición al que recomendé nel so momentu que quedare al otru llau la mar. Y recomendé que quedare pa Bernal, porque val más pa falar de teoría de tresformación que pa cumplir cargos de responsabilidá. Los egos son fatales.

Ye del too preocupante qu'a mediu añu d'unes eleiciones autonómiques y municipales, la candidata d'un partíu –sofitada ampliamente–, nun apaeza en denguna rede social de la formación a la qu'arrepresenta, nin citada por denguna compañera de la Coordinación..., sacantes menacies de ser sancionada como sancionaes foron otres.

Ye grave que la máxima responsable d'Organización d'una formación estatal nun escriba nin un murniu mensaxe de sofitu o coordinación a esta candidata –pesie a ser avisada pa nun quedar mal–. Tampoco la responsable máxima d'esi partíu, pero al tar invisibilizada igual ye que tampoco yera esperable.

Paez que se-y impugna nun comunicáu a la candidata'l movilizase –como siempres– o facer actos –como siempres– nos conceyos d'Asturies. A vegaes paez que'l ridículu cotiza o dalgo.

En tou casu, les actitúes qu'amuesen son d'un cinismu y al tiempu d'una falta de curiaos impropies del que se xube al estráu día sí y día tamién con voz sele a falar d'ellos.

Pero bueno, ye que yá nel so momentu la deceición foi tan sumamente grande que práuticamente queda poco p'asumila definitivamente.

Nestos tiempos onde tamién la poesía paez servir d'escusa pa dalgunes xentes de bien, podríemos igualmente facela servir pa remover.

 

Ellí onde otros proponen obres

yo nun pretendo otra cosa qu'amosar mio espíritu.

La vida ye un consumise n'entrugues. 

Nun pescancio la obra xebrada de la vida. 

Nun amo la creación dixebrada. 

Nun pescancio tampoco l'espíritu xebrao de sí. 

Cauna de les mios obres,

caún de los planes de mio mesmu, 

cauna de les mios floraciones xelaes

de mio vida interior echa la so baba sobro min. 

 

                                    Artaud

                                   

 

Viven en nós innúmberos;

si pienso o siento, ignoro

quién ye que piensa o siente.

Soi namái'l llugar

onde se siente o piensa. 

Teo más almes qu'una.

Hai más yos que yo mesmu. 

Nostante, esisto.

Indiferente a toos.

Fáigolos callar: yo falo.

Los impulsos cruciaos

de cuanto siento o nun siento

disputen en quien soi.

Ignórolos. Na dicten

a quien me sé: yo escribo.

 

                                    Pessoa

           

 

¡Feliz obreru coles sos ropes de domingu!

Con capa buxa rellumante, elegante xilecu, 

mangues bien ceñíes

y sombreru

so la tiesta, a la ilesia va él.

Toles vegaes, con arrechu, consciente, 

Dirixe p'abaxo, 

una mirada so la gran flor pendiente,

prindada combaya so ñariz. 

Nun envidia al "beux" más gay de Llondres. 

Na Ilesia toma asientu pente les files,

fai les reverencies debíes, 

como la meyor de les plegaries

que'l so significáu menos conoz.

Preparáu pal sermón en seliquino sopor

esconsona gayasperu nun fin bienllegáu.

 

                                    Austen

 

Señor,
La xaula tornó páxaru
y coló esnalando
y el mio coral allorió
porque agulla a la muerte
y sorri tres del vientu
a mios delirios

¿Qué fadré cola llercia?
¿Qué fadré cola llercia? 

Yá nun bailla la lluz na mio sorrisa
nin les estaciones amburen palombes
nes mios idees.
Les mios manes esnudaren
y colaren au la muerte
deprende vivir a los muertos.

Señor,
l'eire escármame'l ser
tres del eire hai bisarmes
que beben mio sangre.

Ye'l desastre
ye la hora del vacíu non vacío
ye l'intre de posar piesllera nos llabios
sentir a los condergaos glayar
contemplar a caún de los mios nomes
aforcaos na nada.

Señor,
Teo venti años
tamién los mios güeyos venti años tienen
y sicasí nun dicen res.

Señor,
Consumí la mio vida nun intre
La inocencia cabera españó
Agora ye nunca o enxamás
o cenciellamente foi. 

¿Cómo nun me suicido frente al espeyu
y desapaezo pa reapaecer na mar
Onde un gran barcu esperaría
con lluces enceses? 

¿Cómo nun estrayo les mios venes
y faigo con elles una escala
pa fuxir al otru llau la nueche? 

L'entamu parió la fin
too continuará igual
Les sorrises foliaes
L'interés interesáu
Les entrugues de piedra en piedra
Los biecos que sonsañen amor
Too continuará igual

Pero los mios brazos insisten al mundiu abrazar
porque entá nun saben
Que ye sero abondo
(pa claudicar)

Señor
Echa los féretros del mio sangre

Recuerdo la mio infancia
cuando yo yera una vieya
Les flores morríen nes mios manes
Porque la dancia xabaz de l'allegría
desaniciaba'l coral

Faigo alcordanza de les prietes mañanes
de sol
cuando yera neña
Ello ye ayeri
Ello ye va sieglos

Señor,
La xaula tornó páxaru
tarmió'l mio enfotu

Señor,
La xaula tornó páxaru
¿Qué fadré cola llercia?

 

            Pizarnik

Y asina, ente cantares de serena, habrálos que nun entiendan que facer el ridículu, esbabayar, facer discursu ensin conteníu dalu, nin cotiza, nin desgrava, namái que fai mal. 

Y como diz el refraneru castellán: "A buen entendedor, pocas palabras bastan".

Contador Estadistiques