Resultancia a les eleiciones xenerales 2011: Asturies

25 Payares, 2011 por Daniel Fernánde...

Daniel Fernández Blanco's blog
Inicie sesión o rexístrese pa espublizar comentarios

Taxonomy upgrade extras:

El 20-P les resultancies eleutorales fueron abondo previsibles y con poques sorpreses, quiciabes l’elementu más novedosu ye la rotura del bipartidismu puru, ensin existir variaciones significatives na participación nin nel votu en blancu o nulu, pero podemos analizar les resultancies de cada partíu:

PP: 3 diputaos col 35,41% de los votos, ye la fuerza más votada. Puede vese como’l ganador de les elecciones, porque anque baxa respectu al añu 2008 (4 diputaos y 41,58% de los votos) vence a los socialistes y frena la sangría de votos que-y supunxo FAC nes autonómiques. Paez claro que la sigla PP en Asturies nun ye un problema, pero tamién que’l PP asturianu nun despierta nengún enfotu (toos sabemos qu’a les xenerales vótase a Rajoy independientemente de quién se presente en Asturies).

PSOE: 3 diputaos col 29,19% de los votos. La mesma llombada qu’a nivel estatal (28,73%) col agravante que nel añu 2008 la resultancia n'Asturies fuera muncho meyor que nel Estáu, 46,93% y 43,87%, respeutivamente. Polo tanto’l baxón n'Asturies ye de 17,74 puntos frente a los 15,14 estatales. La única esceición importante foi Xixón, onde’l PSOE volvió ser la fuerza más votada, pero con un 29,79%, polo que la victoria debióse más a la mal resultancia del PP qu’a un ésitu del PSOE, que llogró una resultancia similar a la media asturiana.

FAC: ésitu con sabor a fracasu, yá que queda bien per debaxo de les sos mires, pasando de la primer fuerza nes autonómiques a tercer fuerza a les estatales col 14,75% de los votos y un diputáu. De xuru, el diputáu consiguíu dará-y una visibilidá bien importante fora d'Asturies y va ser la voz d’Asturies fora de les nueses fronteres, pa bien o pa mal, asina que pueden sacar muncha rentabilidá política d’esta resultancia. Fracasu absolutu de l’aventura madrilana (0,19% de los votos) que de xuru restó-y votos n'Asturies del sector más rexonalista y molestó a un asturianismu cada vez más escépticu con esta opción.

IX: gran ésitu electoral pol tresvase de votos que recibió del PSOE, doblando práuticamente los sos votos, pasando del 7,18% al 13,27%. Recupera’l diputáu perdíu nel 2004, cola dificultá añedida qu'esi añu Asturies tenía 9 diputaos y anguaño namás 8. El so retu va ser xestionar esta resultancia con un PSOE n’ascensu y ensin cuntar col númberu 1 de la organización a nivel estatal como candidatu n'Asturies, como yera’l casu de Llamazares. Tien el pequeñu mal regustu de pasar a ser la cuarta fuerza político d’Asturies pola irrupción de Foro, cuando tradicionalmente foi la tercera.

UPyD: per debaxo de la media estatal, 3,91% frente al 4,69%. Ta claro que se confirma como la gran fuerza nacionalista española, que ye’l centru del so discurso políticu. Queda por ver la so influencia fora de Madrid, onde llogra 4 de los sos 5 diputaos, a sumar el llográu en Valencia onde entra nel parlamentu l’actor Toni Cantó. Consolídase como quinta fuerza política d’Asturies con opciones reales d’entrar nes instituciones asturianes y llocales.

Equo: primer vegada que se presenta nuna elecciones llogrando 3.998 votos, de xuru per debaxo de les sos mires, pero establezse como única fuerza non institucional (si nun cuntamos el diputáu llográu por Compromis-Equo en Valencia) que puede plantegase seriamente aspirar a entrar nel parlamentu asturianu y los sos conceyos, sobremanera si apuesta por estratexes similares a les de Valencia.

El restu de les fuerces polítiques suman 9.204 votos, nun llegando nenguna al 0,5% del total y moviéndose nel meru testimonialismo, onde tampoco da la impresión que nenguna tien una voluntá política de salir, moviéndose ente’l votu identitario ideolóxicamente falando y el votu protesta.

* Restu de fuerces per orde de resultancia: Escaños en Blanco (Eb, 0,40%), Partido Animalista contra el Maltrato Animal (PACMA, 0,34%), Partíu Comunista de los Pueblos d’España (PCPE 0,18%), Andecha Astur (AA, 0,17%), Fartos.Org (0,13%), Por un Mundo más Justo (PUM+J, 0,05%), Partido Democrático y Constitucional (PDyC, 0,04%), Solidaridad y Autogestión Internacionalista (SAIn, 0,04%), Partido Humanista (PH, 0,04%) y UCE (Unificación Comunista d’España 0,03%).

Daniel Fernández Blanco ye voceru de Bloque por Asturies-Unidá Nacionalista Asturiana (UNA) de Xixón.