Resignanos o rebelanos

Celebramos otru ocho de setiembre, otru día d'Asturies, otru día de Cuadonga. Y nesa fecha conmemoramos que, fai mil trescientos años, unos asturianos -como nós- enfrentáronse al enemigu más poderosu del so tiempu, a un imperiu que s'estendía per trés continentes, a un exércitu que nun conocía la derrota. El combate yera claramente desigual pero aquellos asturianos nun se rindieron. Conocíen bien les dificultaes y, con too y con ello, siguieron alantre. Y nun foi fácil, nin rápido; nun lo foi n'absolutu: dempués d'aquella primer victoria –bien espeyada nos llibros d’historia- a los nuestros antepasaos inda-yos quedaron munches décades de sacrificios hasta poder ufiertar, a la so tierra y a los sos fíos, un futuru dignu, un futuru propiu.

Nós somos, agora, los fíos d’aquelles xeneraciones valientes. Y, agora, como ellos, enfrentámonos tamién a dificultaes importantes. El panorama económicu que nos arrodia ye desolador: ési ye’l nuestru enemigu angüañu. Un enemigu poderosu, un enemigu que tamién s’esparde per dellos continentes y un enemigu que, tamién, parez invencible. Pero que nun lo ye. De nós depende salir d’esta situación y pa ello precisamos, sobremanera, una cosa: esperanza. La xente precisa enfotu. Los asturianos precisamos saber que podemos arreblagar esta crisis. Y podemos facelo. Apretando los dientes, trabayando duru y permaneciendo xuntos, los asturianos podemos volver enseñar que nun hai enemigu invencible; que nun hai enemigu poderosu; y que’l futuru va poder volver a ser nuestru si, enfrente, somos a poner rebeldía onde namás había resignación.

Nun va ser fácil. Nun lo va ser n'absolutu. Nun va haber atayos. Nun podemos permitinos gobernantes que construyan castiellos nel aire, que faigan falses promeses y que gasten les nuestres perres de manera irresponsable namás pa danos satisfacción: pa xenerar falsos empleos o falsos negocios con tal de volver ganar les elecciones. Porque, a la fin, les factures de la so fiesta tán al nuesu nome y somos nós los que les tenemos que pagar. Por eso el problema d’Asturies ye claramente políticu: porque cuando los recursos son llimitaos y la so asignación ye una cuestión d'equilibriu de fuerces desiguales, los ciudadanos nun podemos siguir xugando’l papel d'espectadores asustaos.

El preciu de la resignación ye mui altu. La consecuencia principal d’estes polítiques combayones de les décades pasaes ye'l desempléu. La falta de competitividá de la nuestra industria y la falta de sofitu a les nuestres empreses y a los nuestros trabayadores trai de resultes l'aumentu del paru. Fai falta una estratexa clara pa combatilu –sobremanera'l desempléu xuvenil- y nun paez que l’actual executivu la tenga. Llevamos cien díes de nuevu gobiernu socialista y la so autovalorción ye, textualmente, que: "Javier Fernández arregló la grave crisis política de la rexón y dió respuesta dende les instituciones autonómiques a la gran recesión económica mundial". En fin; ye una opinión. Optimista atreveríame a dicir. Y autocombayona. Pero que contrasta bien d’ello cola que-y merecía l’anterior gobiernu de Foru, del que, cuando tamién llevaba namás que cien díes funcionando, la d’aquella oposición dixo tamién textualmente que: “nun podía faese peor”. La doble vara de medir.

Una doble vara de medir que pue entendese meyor con un últimu datu: nos primeros cien díes de va dos lexislatures, la oposición solicitó 18 comparecencies a los conseyeros d'Areces pa qu'esplicaren los sos programes. Va un añu, tamién nos primeros cien díes de gobiernu, les comparecencies solicitaes a los conseyeros de Cascos fueron 86. Y agora, nestos últimos cien díes, les comparecencies solicitaes a los conseyeros de Fernández fueron exactamente 14. Ello ye; 18, énte 86, p'agora volver a 14: eso ye lo que dalgunos entienden como vuelta a la normalidá. O dicho d’otra manera; qu'hai Presidentes y Gobiernos a los qu’hai que dexar gobernar y otros a los que toca facer la vida imposible. ¿Por qué? Porque nun son los de siempre, porque nun tan nel pautu.

Pero, como bien enseña la historia, el futuru ye de los valientes, de los que, conociendo les dificultaes, siguen peleando y de los que saben camudar la resignación por rebeldía. Y ye que, a lo último ¿Por qué merez la pena lluchar? ¿Por qué existen les instituciones? ¿Pa qué nació Foru? ¿Pa camudar Asturies en favor de los más débiles que sufren les crisis? ¿O pa combayar colos poderosos que saquen grandes beneficios de la decadencia?

         Queda munchu por facer y, xuntos, tenemos que ser quien a facelo. Puxa Asturies.

Inaciu Iglesias ye conceyal de Foro Asturias en Noreña