Otres emisiones clandestines de la televisión

La Xunta pola Defensa de la Llingua Asturiana acaba de denunciar la estrena clandestina de la temporada nueva de la serie infantil “Los Bolechas”, que se ta emitiendo de llunes a vienres a les 9.00 en TPA y ensin publicidá previa. Sicasí, l'actitú de la televisión asturiana nun ye nueva nel mediu, porque tien la semiente en práctiques feches por TVE hai décades, anque en tiempos más díficiles pa la llibertá d'espresión y les cultures minoritaries.

Por exemplu, a mediaos de los años sesenta, el Réxime quería ameyorar la so imaxe internacional y cultura y televisión presentáronse como unes rellaciones públiques mui afayadices, polo que s'empezaron a producir ficciones al gustu de los xuraos internacionales. Con esi enfotu nació* Historia de la frivolidad *(1967). Con dirección y guiones d'Ibañez Serrador y de Jaime de Armiñán, trátase d'una burlla a la moralidá franquista que se convirtió nún de los clásicos de la historia de TVE. La ficción narra la historia del erotismu y los esfuercios de la Lliga Femenina contra la Frivolidá pa esconder los encantos del cuerpu humanu. La idea de filmalo surdió de la mente del entós Director Xeneral de RTVE Adolfo Suárez y de Juan José Rosón.

La intención yera mostrar al esterior la imaxe d'una España moderna y tolerante al traviés d'un espectáculu irónicu que ponía n'evidencia ún de les mayores vicios del franquismu. Sicasí, l'espaciu atopó col oxetu de la so burlla y tuvo que modificar el títulu, polo que la *Historia de la censura* orixinal quedó en *Historia de la frivolidad*. El conteníu tampoco contó col vistu bonu del censor de TVE, qu'amenació con dimitir si emitíen l'espaciu. El programa presentóse al Festival de Televisión de Montecarlo, onde gano un premiu, pero la organización esixó que pa participar debía estrenase enantes. Por eso, programóse a medianueche depués del himnu nacional, momentu qu'anunciaba'l fin de la emisión, y ensin publicida previa.

Per otru llau, n'ochobre de 1964, una vez acabada la programación de la tarde, TVE emitió namás pa Cataluña la representación de *La ferida lluminosa*, obra de teatru de Josep María de Sagarra. A pesar de qu'esti espaciu forma parte de la historia al ser el primer programa de televisión rodáu en catalán, emitóse ensin nengún tipu de publicidá. Ye de reseñar que, menos la llingua na que falaben los actores, tol espaciu utilizó'l castellanu: lletreros, títulu, la presentación… El programa yera un exemplu de la permisividá dientro de la clandestinidá que-y dio l'últimu franquismu al usu de la llingua catalana. Y ye que l'espaciu nun tenía nin presupuestu, porque nun existía oficialmente. Muestra del calter clandestín ye que nin salía anunciáu na revista oficial de TVE, *Tele Radio*.