Madrid: billete de vuelta

Va dos sábados fui a Alcorcón. Once hores d’autobús en total pa ver un partíu de fútbol, pa sufrir y pa contemplar cómo’l mio equipu volvía p’Asturies con una derrota como regalu de la capital del Estáu. Tolos que llevábemos la camiseta azul esi día dimos la vuelta col ánimu gachu pol golpe moral, pero atrévome a dicir que nun yera’l fútbol l’únicu motivu de los nuestros güeyos atristayaos. Había dalgo más.

Préstame poner la oreya y sentir les charres de la xente, ye un defeutu como otru cualesquiera. El casu ye qu’esi sábadu sentí y falé con unes cuantes persones, tamién contemplé más d’una y de dos conversaciones: "Agora toi viviendo en Móstoles, yá va cuatro años que marché",  "vinimos andando, tenemos el pisu alquiláu equí cerca",  "quedamos hasta mañana, que vive una amiga nuestra en Fuenlabrada"...

Les pallabres nunca yeren les mesmes, pero sí se paecíen muncho. Y, amás de pallabres, tamién xestos. Abrazos al mediudía de persones que llevaben meses ensin vese y que namás falen al traviés d’una pantalla. Abrazos de despidida depués del partíu, coles xornaes de fiesta nel horizonte. Toos diferentes y toos asemeyaos.

Montáu yá nel autobús, con delles hores per delantre pa da-y vueltes a la tiesta, alcordéme de la noticia que lleere unos díes enantes, con un conteníu que me sonaba d’otres vegaes. Les persones asturianes que viven fuera del país podríen formar el tercer conceyu más pobláu d’Asturies. Dolióme ser testigu d’esa realidá esti sábadu en Madrid.

Nun ye xusto y nun ye positivo. Abrió la variante de Payares y dalgunos políticos y medios de comunicación solo falen de les frecuencies de trenes con Madrid y de l’alta velocidá. El turismu como oportunidá siempre apaez como salsa nesi platu. Y, mientres, miles d’asturianes y asturianos siguen sufriendo la conderga d’una vida fuera de la tierra. Mozos que nun puen comer cola familia los domingos, unos nietos que namás que ven a los güelos cuatro o cinco veces al añu, grupos d’amigues que solo s’axunten en vacaciones, llocos y lloques que solo puen sufrir col so equipu de fútbol formando parte de l’afición visitante. Qu’un partíu políticu como Aína tenga como vocera a una muyer que vive en Barcelona nun ye casualidá, sinón un reflexu de la situación del país.

¿Vamos tener AVE, o Alvia, o como lo quieran llamar? Pues hai qu’aprovechalo. Que’l tren nun sirva pa convertir Asturies nun paraísu turísticu faltu d’identidá, sinón que permita a la nuestra xente tornar a casa. Que los caminos nun seyan p’abandonar Asturies camín de Madrid –o de cualesquier otru sitiu–, que les asturianes puedan garrar un billete de vuelta. Vivienda, trabayu, tresporte, sanidá, educación… Sabemos cuáles son les condiciones a camudar, agora fai falta trabayar por meyorales. Necesitamos ufrir un país onde pague la pena vivir, qu’abra les puertes a les persones emigraes a volver. Que tengamos un estadiu onde preste y seya posible xugar como llocal.

Pelayo Martínez Olái ye profesor y compañeru de la Mesa Nacional d'Aína.