Llingua y Universidá

Santiago García Granda's picture

Una precandidatura a Rector de la Universidá d’Uviéu comprometía colo asturiano

Les eleiciones al Rectoráu de la Universidá d’Uviéu son un momentu cimeru pa facer planes de futuru y llograr que la Universidá de nueso tenga una meyor posición nel contestu nacional ya internacional y asuma un papel más decisivu nel desendolcu del Principáu d’Asturies. Y esi ye’l momentu en qu’amás de falar de cercanía, tresparencia, dinamismu, profesionalidá y trabayu n’equipu, nun se puen escaecer aquelles cuestiones d’imaxe y valir científicu que dacuando s’escaecen. Y la llingua asturiana ye una d’elles.

La mio candidatura va querer que vuelvan les ilusiones y los impulsos que motivaron a esta Universidá y va querer que se faiga con una visión internacional, xeneralizando l'usu del idioma inglés y potenciando l'usu d'otros idiomas estratéxicos, pero tamién averada a lo propio. Ye necesario anovar, pasu ente pasu, el nuesu facer y la imaxe de nueso, pero siempres dende’l respetu a la tradición centenaria de la Universidá d’Uviéu y del pueblu asturianu al que pertenez y tien de rendir cuentes.

Pa poder algamar eses ilusiones, esos impulsos, esa motivación pernecesaria, el nuevu Rector de la Universidá d’Uviéu ha cuntar cola esperiencia necesaria na xestión universitaria recién y el tiempu necesariu pa protagonizar, direuta o indireutamente, una estratexa universitaria a 10 años. Y nesa estratexa, l’asturianu tien que xugar un papel. Xustamente’l papel que la Llei-y reserva y que nesti momentu nun apaez desenvueltu como debiere.

La Universidá tien d’amosar la so imaxe corporativa en llingua asturiana con total normalidá y esparder l’usu de la llingua na cartelería o la señalética. Ye lo que dicta la Llei d’Usu en vigor y la Universidá tien qu’acatalo y amosalo con arguyu. Y darréu d’ello ufiertar qu’un porcentaxe significativu de convocatories, solicitúes y formularios puean facese n'asturianu al tiempu qu'en castellán.

Poro, esto nun ye abondo. Por eso, esta candidatura tien propuesto crear, con personal propio y motivao, una Oficina de Normalización Llingüística na Universidá, pa promover l'usu del asturianu y resolver duldes n'actuaciones concretes. Y amás, va proponer el conocimientu activu del asturianu facilitando al alumnáu y al profesoráu planes formativos internos que permitan, nel so casu, actividaes docentes na llingua d'Asturies.

Y la formación y la investigación académica en llingua asturiana tampoco nun van tar escaecíes del programa d'esta candidatura porque nelli va contemplase la meyora del plan d'estudios del actual "minor" hasta convertilos nuna mención, estudiando la posibilidá d'afondar na so entidá académica siempre col másimu consensu de la comunidá universitaria. Y va afitase una normativa eficaz que garantice, dende la d'anguañu, la defensa de Tesis Doctorales, TFG y TFM en llingua asturiana.

Too ello, ensin escaecer el diseñu de planes específicos pa promover y facilitar la investigación de la llingua asturiana, demandando al Ministeriu la especialidá docente pal profesoráu d'Educación Primaria y Secundaria.

La mio candidatura contempla tamién que la Universidá edite en llingua asturiana y collabore a dignificar el teatru asturianu y n'asturianu, impulsando al tiempu  la lliteratura y el cine na nuesa llingua y fomentando la música asturiana con recitales n'asturianu de los más estremaos estilos.

Toes estes idees, y otres munches, habrán debatise na comunidá universitaria a lo llargo del periodu de campaña electoral. Pero ye'l nuesu determín que la llingua y la cultura asturiano nun s'escaezan d'un debate onde tien de vese en comuña progresu ya inclusión, afitando’l calter de la Universidá d’Uviéu como institución científica y pública al serviciu del progresu d’Asturies, garantizando’l compromisu de la Universidá cola nuesa comunidá dende un puntu de vista social, cultural, económicu y llingüísticu, desendolcando la vertiente social de la Universidá d'Uviéu.

Contador Estadistiques