L’asturianu ye español

Español ye un axetivu que quier decir que daqué ye de España. España ye un estáu social, democráticu y de derechu que ta sentáu en territoriu del sur d’Europa y el norte d’Africa. Españoles son, poro, persones africanes como les nacíes en Canarias y persones europees como les nacíes n’Asturies.

Españoles son les persones musulmanes de Ceuta y Melilla que tienen families asentaes nesi territoriu dende tiempos inmemoriales y española ye l’autoproclamada cristiana Rocío Monasterio que vien de familia inmigrante. Porque la definición d’español ye la que marca la llei, non la que tú queríes que sía. Asina un periodista como Moha Gerou, que pol so aspeutu físicu pue inferise que ye fiyu d’inmigrantes, ye tan español como Abascal, que pol so aspeutu físicu podría confundise con un moru bien fácil.

Porque nun ye’l color de la piel o la forma la cara lo que marca si yes español, si non la llei. Asina tamién les persones saḥaruais que yeren españoles cuando’l Xuan Carlos de Borbón-y regaló’l Sáḥara al so amigu’l rei de Marruecos, son tan españoles como’l señor Buxadé. Y cuando Franco-y vendió Guinea Ecuatorial a una familia de tiranos, dalgunes persones conservaren la nacionalidá española y son españoles tanto eses persones como los sos fíos y fíes. Son españoles tantu o más que’l rei Felipe, que ye fiyu de dos inmigrantes.

Eso pa les persones, pero pa les coses podemos facer una analoxía. Por exemplu, l’Ebro ye un ríu español, el Barça ye un club de fubol español o’l Guggenheim de Bilbao ye un muséu español porque ta dientro d’España.

Siendo too eso asina, una llingua que se fala en España será española, ¿o non? Si’l gallegu se fala n’España y namás que n’España será una llingua española. L’asturianu fálase n’España y namás que n’España; será tamién español, ¿o non? Entós si daquién diz que sólo se pue cantar n’español quier decir que pue cantase en vascu, catalán, asturianu, gallegu y castellán, pero nun pue se cantar n’inglés, por poner un exemplu. Esto ye, que la conceyala de VOX de Xixón nun va contratar a Chanel pa que cante la canción que llevó a Eurovisión por usar inglés. Tampoco contratará a Bruce Springsteen claro. Será cosa de torna-y les canciones al asturianu pa que lu dexe cantar en Xixón.

Nun sé, camiento que la conceyala tien una idea de lo que ye España un puco inconstitucional. L’asturianu ye una llingua tan española como’l catalán o el castellán, porque lo que ye español y lo que non márcalo la llei, non el fascismu.

Xabel Andrade ye candidato al Senáu por Sumar n'Asturies.