Esta vez paso de facer autocrítica

Esta vez non. Esta vez nun toca fustigase. Yo nun pienso facelo. Que lo faigan los que crean que tienen razones pa ello. Yo paso.
 
La nueche del día 22 volví pa casa gachu y derrotáu, como hai cuatro años, como hai ocho y como hai doce. Como siempre. Otru fracasu más del asturianismu d’izquierdes. Nun ye la primera, nin la segunda. Yá debería tar avezáu. Pero esta vez foi diferente.
 
Porque esta vez, polo menos dende’l mio puntu de vista, ficiéronse les coses bien. Igual nun fueron de la manera perfecta. Pero sí muncho meyor que n’anteriores ocasiones. Esta vez había unidá. La maldita unidá, tantes veces cacareada. Habíala. Faltaben algunos, y yo sigo echándolos de menos, pero yeren residuales, como asina lo reflexaron les urnes. Polo demás, tábamos toos a una.
 
Esta vez había un bon candidatu. Al mio entender, el meyor que vi dende que tengo usu de razón política. Y el meyor de tolos que se presentaben, con muncha diferencia. N’argumentos, n’oratoria, en convicción y en recursos. Yera’l meyor.
 
Esta vez hubo presencia mediática. Non tola que deseábamos, nin tola que mos correspondía. Pero húbola. Diéronse ruedes de prensa tremaes de periodistes de medios importantes, y al cabeza de llista conocíenlu en toa Asturies.
 
Esta vez había una ilusión y había un proyectu seriu. Nun yera una aventura estético-ideolóxica col únicu fin de sacar un puñáu de votos pa ser los menos minoritarios dientro de los mui minoritarios. Esta vez les espectatives fueron otres, anque la realidá acabara siendo asemeyada a lo de siempre.
 
Pero tampoco valió. Al final, nin 7.000 votos se sacaron. Decepcionante. Mui decepcionante. Nel mio casu, la mayor decepción que llevé en términos electorales.
 
Igual se cometieron algunos errores. Nun sé. A lo meyor, si’l candidatu llevara corbata, en cuenta pendiente, arrampuñábense unos cuantos votos más. O si los carteles se lleguen a facer más grandes. O si en cuenta de ser la suma de dos, fuéremos la suma de trés. O si amás de menganu y citanu, tamién llega a tar na llista fulanu. Pue ser… pero nun me paez qu’acabara cambiando muncho la cosa.
 
Yo, dempués de dixerir la enésima frustración política, prefiero sacar otru tipu de conclusiones: esto ye lo qu’hai. Ésta ye l’Asturies que mos toca vivir. Nun hai otra, por muncho que queramos inventala. Y llograr que la que tenemos mos atienda ye muncho más difícil de lo que pensamos.
 
Sé que suena a verdá de perogrullu, pero véome na obligación de proclamalo. Habrálos que pensarán que ye un xestu d’autocomplacencia. Pero nun m’importa lo que piensen ésos. Lo que m’importa ye lo que piensen los míos. Porque yá entamaron a correr los mensaxes de siempre. Yá entamaron a circular los lladríos de los agoreros miserables que cada cuatro años faen la mesma leña del mesmu árbol baltáu. Y nun quiero que toa esta demagoxa trescale na mio xente.
 
Nun faigáis casu de los pregoneros del abismu. De los babayos que na puta vida dieron la cara por nada y que cada vez que tienen oportunidá mos escupen el so escepticismu. De los monxones que’l día 22 nin se molestaron en dir a votar, y llueu vendrán col cuentu de que toos son iguales, faciendo bandera del so pasotismu. De los cánceres que nagüen como l’agua de mayu por que mos deamos la hostia pa venir a echámoslo en cara. De los hipócrites que creen que porque pegaron cuatro carteles cuando teníen 20 años tienen derechu a renegar de too. De los oportunistes qu’agora súbense al carru de la llamada ‘Democracia Real’. La mesma pola que munchos compañeros míos lleven años y años lluchando dende organizaciones minoritaries que siempre tuvieron les puertes abiertes a la iniciativa de toos estos vendemotos. Pero nunca apaecieron per ellí. Pásenlo meyor pintando cartulines y echando discursos na Plaza La Escandalera. A mi hubiérame prestao dir tamién. Pero nun tenía tiempu. Taba echando una mano nuna campaña electoral.
 
Pasái de toos ellos porque esta vez nun tienen razón. Nunca la tuvieron. Pero agora menos. La razón ye la de la xente que puso la carne, los güevos y los ovarios. Los aduladores de la negación nun tienen nada qu’enseñavos.
 
Dende estes llinies quiero mostrar el mio más humilde reconocimientu, respetu y apoyu a les persones que trabayaron como auténticos y auténtiques cabrones na coalición Bloque por Asturies-Unidá Nacionalista Asturiana. El vuestru compromisu vistió de dignidá lo qu’antes yera una comedia. Gracies a toos y a toes por resucitamos la ilusión. A mi polo menos resucitástismela. Y pueo aseguravos qu’eso nun yera fácil.
 
Diz un cita que si lluches pues perder, pero si nun lluches tas perdíu. Nosotros el día 22 lluchamos y perdimos. Algún día ganaremos. D’eso toi seguru. Ánimu y a siguir lluchando. Y sobre too a siguir creyendo. Merecéislo.