Bueno, val, acabóse

Pues eso: bueno, val, acabóse. Nun digo eso tan vulgar de "ente toos la mataron y etc. etc.". Agora yá too da igual. Dios, o’l so representante n’Asturies que ye Barbón, diz que s’acabó. Finó. Pa la prósima llexislatura, si Dios quier, o seya, si él quier.

El fusilamientu fue al riscar. Con nocturnidá y alevósia. Non alevosía, que ye una pallabra guapa. Non, con alevósia, acentuao pa más escarniu. Otra víctima más pa sapozar nes cunetes. Otru muertu ensin reconocer. Pa que nun puedan enterralu con un nome y una fecha. Asina, anónimu, como correspuende a estos tiempos de mierda que tamos viviendo. Con reforma llaboral y salariu mínimu, con paguines pa los 'xubilatas' y subvenciones pa poder publicar unos llibros que naide va a lleer, masque los que los escribieron.

Lo que más me ḥode son les sonrisines polo baxo de toos esos qu’emporcaron les páxines de los periódicos pa difamar, pa engañar, pa facer gala de la so inorancia antiasturiana. Esi presumir con cara fatu de lo que nun saben (quiero pensar, porque si lo saben ye peor). Esos qu’asisten al funeral del anónimu non enterráu como Dios manda (¡cuántu Dios, carái!) y dante la mano diciendo, qué pena que morriere, nosotros queríamoslu muncho. Cola sonrisina polo baxo.

Si polo menos fuere a cara descubierta. Si polo menos tuvieren la decencia de dicir: Sí, ho, matámoslu nosotros. Porque lu odiábemos. Porque vos odiamos a vosotros y tolo que representais. A esi país pequeñu, húmedu, asitiáu ente montañes onde llueve tol añu (agora cada vuelta menos) Que tien una bandera maricona, con colores azul y mariello y, pa más aquello, una cruz en mediu. Ehí lo tenéis. Mirái a ónde vos llevó toa esa historia (con lletra pequeña, cola grande nun s’atreven). ¡Facéi un referendum, anda! A ver a quién interesa esa historia vuestra.

Bueno, en fin, val, acabóse. Güei enterramos al Bable. ¡Que la tierra-y seya leve!