Asturies, agora más que nunca

Solemos dicir que nesti día,  8 de setiembre, tenemos poco que celebrar, que con la mala traza que tien too ye hasta frívolo qu’haya folixa. Pero yo niégome a que me quiten eso tamién, niégome a que los que nos traxeron y entá nos lleven a la situación llaceriosa que vive esti país me faigan resigname. Niégome a que me quiten l’allegría y l’arguyu vivir con esta xente y nesti país, Asturies.

Toi contenta por vivir equí y por tener tanta xente alredor pa trabayar por un futuru meyor p’Asturies, merezlo la xente que vive, que vivimos nella. Tamién la que tuvo qu’emigrar, que quisiera tar equí con nos, y nun puede.

Lo que dende llueu nun merecemos, ye que nos masuñen la nuestra historia pa ponela al serviciu d’un proyectu tan vergoñosu como’l que se vivió pela mañana nel oriente d’Asturies. Lo visto güei tien peor traza que la qu-y dexaron a la talla del sieglu XV de Tinéu, que yá ye dicir.

Díxose bien alto güei, Asturies nun tien rei.

Merecemos que nun nos quiten una historia que tien que recordamos lo que fuimos, pero también lo que queremos ser. Que tenemos mucho qu’aportar pa qu’España nun seya un ermu, planu y fríu, que nun sepa respetar y reconocer los pueblos que nella viven. Tenemos que tener la nuestra voz nun proyectu de xusticia social, convivencia y plurinacionalidá, d’igualdá, feminismu y llibertá.

Nun momentu como esti, onde tamos inmersos nun debate sobre la estructura territorial del Estáu o donde vamos tener que sentanos a falar d’un tema tan fundamental como ye’l de la financiación autonómica, toca reivindicar el papel de la política al serviciu de la xente, de la mayoría social. Por exemplu, d’esa xente que tien, que tenemos , que pagar un fielatu rídiculu ya inxustu cada vez que salimos o entramos n’Asturies pel Güerna.

Ye la voz de les nuestres diputaes y diputaos la que tien que llevantase cuando se nieguen a quitanos esa multa por movenos, o la que tien qu’aportar cuando se quier facer un procesu descarbonización que nun ye quien a mirar penriba del Guadarrama.

Tamos fartuques de salir tan mal nes semeyes, de ser la comunidá que peor sal de la crisis, a la que más-y ta costando recuperar los niveles d’empléu previos al crack financieru. De ser el sitiu cola peor tasa d’actividá del Estáu, y con una perspectiva demográfica terrorífica que ye una condena por un delitu que nun cometimos. Esa nun puede ser la nuestra seña d’identidá, tenemos que ser nós, de la mano con los otros pueblos del Estáu español, les que-y demos una patada a los que viven bien nun mundu de precariedá y desigualdá.

Hai que poner un discursu y soluciones enriba la mesa que miren pa l’Asturies real. Plantase énte los que reconocen una crisis demográfica y d’emigración brutal, pero ponen el gritu nel cielu cuando peleamos por afitar un derechu como ye’l de la educación gratuita ente los 0 y 3 años. Si nun son quien a entender esa necesidá y la xusticia que representa eso, qué podemos espera d’ellos. Yá los conocemos, lleven muchos años nel gobiernu asturianu llevándonos a onde tamos agora mesmu.

Tenemos que ser quien a poner nel mapa una Asturies de la que nun se fala, si nun ye pa lliderar les encuestes negatives.

Va un par de díes vivimos un momentu na Xunta Xeneral que sedría cómicu, de esketch de la hora chanante, si nun fuera polo que representa. La nuestra Cherines dixo que nun fuera quien a entender la intervención del nuestru diputáu Enrique López porque ficiera parte n’asturianu. Dende equí propongo una colecta humanitaria pa unes clases particulares, non d’asturianu, si non de respetu y educación. Poder dicir eso, ye sentise impune, creyer que puede reise de la llingua que siempres faló la mayoría social asturiana. La que se falaba cuando ficieron la talla de Tinéu, nes barricaes del 34, na fuelgona del 62 y na que vos toi falando yo agora mesmu.

Tienen-y mieu porque l’asturianu ye la nuestra llingua popular, y el so reconocimiento ye un emponderamientu de la clase trabayadora que-yos da alerxa.

Tenemos que tar arguyosos de que seya a nosotros a quien nos toque dar esi pasu firme que-y dea l’estatus que merez al nuestru idioma. L’ASTURIANU OFICIAL YÁ.

Cómo vos dicía al entamu, niégome a que me quiten la gana y el derechu de tar contenta de vivir n’Asturies. Vamos festexalo xuntes y xuntos, y tamién vamos pelealo xuntes y xuntos.

Asturies, agora más que nunca.

(Discursu pronunciáu na Folixa Popular de Podemos el 8 de setiembre de 2018 en Xixón).

Yolanda Huergo ye miembru del Conseyu Ciudadanu de Podemos Xixón.