Adiós a Paco Mori

Entérome, con pena, qu’acaba fallecer Paco Mori. Na prensa vien recoyida la so vida y actividaes profesionales, y tamién que “militó” na organización Unidá Nacionalista Asturiana (UNA) Pero Paco Mori fizo dalgo más que militar, nesa organización.

Creo recordar -anque ando flacu de memoria-que yá venía de la Xunta Nacionalista Asturiana, como otros munchos de los que fundamos la UNA, pero en cualquier casu nesta última organización ocupó cargos importantes, nun sólo na executiva. Fue na llista de les Europées de 1989 y creo que nes llocales y autonómiques de mayu de 1991, nes que la coalición PAS-UNA sacó un diputáu y unos cuantos conceyales.Vese nel cartel qu’acompaña a esta entrada con cara de satisfaición y pose d’arguyu.

Llevéme siempres mui bien con él, porque tenía mui bon caráuter y munchu sentíu del humor. Cuando too aquello finó y se fue al carayu, dexé de velu y poco más supe d’él. Agora lleo que morrió. Y vuélvenme al maxín aquelles reuniones nes qu’habia la esperanza de lluchar por una Asturies meyor,  y nes que Paco Mori siempre tenía una rempuesta intelixente y práutica a los problemes que se plantegaben. Que la tierra-y sea leve al bonu de Paco, supongo que defraudáu como tantos otros por cómo tenemos el País.

(Na semeya xunto a Felechosa y Jamín el de Cimavilla)