Zapatero reclama a la Xunión Europea una “declaración xunitaria” contra’l fanatismu y la xenofobia

José Luis Rodríguez Zapatero reclamó a la Xunión Europea una “declaración xunitaria” contra’l fanatismu y la xenofobia tres los atentaos de Noruega que provocaron más de 90 muertos. Estos actos terroristes foron obra d’un ultraderechista.
 
“Tenemos que facer una afirmación xunitaria los llíderes políticos progresistes, conservadores, socialdemócrates, lliberales…, cola democracia noruega, coles víctimes de Noruega, contra la xenofobia, contra'l racismu y contra la intolerancia. Ye la Xunión Europa quién tien que tomar la iniciativa”, sorrayó’l presidente del Gobiernu estatal nuna rueda de prensa conxunta en Londres col primer ministru británicu, David Cameron, tres una xunta ente dambos dirixentes. “Nun podemos siguir cola nuesa axenda como si fora un fechu más n'Europa. Nun ye un fechu más, igual que nun foron un fechu más los atentaos del terrorismu islamista en Madrid o en Londres”, continúo enantes de calcar en que ye necesaria “una reacción solidaria, política y tamién de seguridá” de los Ventisiete.
 
“Tamos ante un fechu mui grave qu'esixe una respuesta europea compartida en defensa de la llibertá, de la democracia y llamando a la movilización frente al fanatismu, frente al radicalismu, frente a la xenofobia. La Xunión Europea ye’l frutu de la llibertá pa la paz, pero ha ser tamién el guardián de la convivencia. Por ello, deseo que'l conxuntu d'Europa reaccione movilizando les meyores virtúes cíviques”, sorrayó’ Zapatero, que reconoció’l puxu que tán teniendo les ideoloxíes ultraderechistas en dellos estaos y apostó por vixilar estos movimientos pela rede.
 
Pela so parte, Cameron calcó en qu'hai que “combatir” toes “les fuercies del estremismu violentu”, yá sía “islamista o de dereches”. “Hai que facer tolo posible pa tar seguros de que podemos controlar a estos fanáticos. Hai que tener cooperación ente axencies d'Intelixencia, la Policía y los ministerios del interior. Hai que facer tolo necesario pa que'l país tea seguru y pa que nun vuelva producise una circunstancia como ésta”, continuó en referencia a Noruega.